Mummi kominn fram úr Bjarna Fel og Rúnari Kristins

Guðmundur Reynir Gunnarsson hefur framlengt samning sinn við KR um þrjú ár en þessi skemmtilegi vinstri bakvörður var lykilmaður í Íslandsmeistaratitli KR á síðasta ári. Þetta kemur fram á heimasíðu KR.

Guðmundur Reynir Gunnarsson varð 25 ára gamall í gær og skrifaði því undir nýjan á afmælisdaginn sinn. Hann færði því KR-ingum í raun gjöf á sínum afmælisdegi því þeir hafa getað treyst á Guðmund Reyni í vinstri bakvarðarstöðunni undanfarin ár.

Mummi, eins og hann er kallaður, spilaði sinn fyrsta leik með KR á 17 ára afmælisdaginn sinn árið 2006 og hann spilaði sinn 226. meistaraflokksleik þegar KR mætti Fjölni í síðustu viku.

Það kemur fram hjá Ólafi Brynjari Halldórssyni á heimasíðu KR að Guðmundur Reynir hafi þá farið fram úr Bjarna Felixsyni og Rúnari Kristinssyni í leikjafjölda og er Mummi nú orðinn fimmtándi leikjahæsti KR-ingurinn.