Eimskipafélagið 100 ára í dag

Eimskipafélag Íslands er 100 ára í dag en félagið var stofnað þann 17. janúar 1914, þar sem á fimmta hundrað manns komu saman í Fríkirkjunni í Reykjavík. Félagið var nefnt Óskabarn þjóðarinnar í fjölmiðlum landsins en upphaf félagsins var einstakt, þar sem 14.000 manns lögðu félaginu til hlutafé. Árið 1915 komu fyrstu tvö skip félagsins til Íslands, Gullfoss í apríl og Goðafoss í júní.

„Það er skemmtilegt og spennandi ár framundan og haldið verður upp á afmælið með ýmsum viðburðum, stórum sem smáum. Það verður mikið um að vera,“ segir Ólafur W. Hand, forstöðumaður markaðs-og kynningardeildar Eimskips.

Mikil og glæsileg afmælishátíð verður haldin í Hörpunni í dag þar sem íslensk dægurtónlist í bland við sögu félagsins verður flutt í Eldborgarsal. Fram koma meðal annarra Björn Jörundur, Valdimar, KK, Bubbi Morthens, Sigríður Thorlacius, Egill Ólafsson, Magnús Eiríksson, Unnsteinn Manuel, Eyþór Ingi og Pálmi Gunnarsson.

„Eimskip er elsta skipafélag Íslands og hefur félagið frá upphafi lagt höfuðáherslu á skipaflutninga til og frá landinu en í dag býður Eimskip upp á alhliða flutningsþjónustu um allan heim,“ segir Ólafur.

Eimskip rekur nú skrifstofur í 19 löndum og hefur umboðsmenn í fjölmörgum öðrum þar að auki.

Saga Eimskips gefin út

Af þessu tilefni hefur Saga Eimskips, Eimskipafélag Íslands í 100 ár, verið gefin út. Um er að ræða þrjú bindi saman í öskju, sögu félagsins, listaverkasafn og skipasögu.

Sagan er rituð af Guðmundi Magnússyni, Þorsteinn Jónsson tók saman listaverkasafnið og Hilmar Snorrason skráði skipasöguna. Saga félagsins er afrakstur umfangsmikillar könnunar frumheimilda í skjalasöfnum, einkum í skjalasafni Eimskipafélagsins. Einnig er stuðst við opinber gögn og umfjöllun fjölmiðla um félagið. Um 400 ljósmyndir, gamlar og nýjar, prýða ritverkið.

„Það er mjög ánægjulegt að sjá 100 ára sögu Eimskips koma út á prenti og í jafn glæsilegum bindum og raun ber vitni. Saga félagsins er afar umfangsmikil eins og gefur að skilja og segja má með sanni að hún sé samofin sögu þjóðarinnar í heila öld,“ segir Gylfi Sigfússon, forstjóri Eimskips.

Hann segir félagið hafa verið mikilvægt áhrifaafl og liður í sjálfstæðisbaráttu Íslendinga á fyrstu áratugum síðustu aldar. Eimskip sé elsta flutningafyrirtæki landsins og hafi félagið frá upphafi lagt höfuðáherslu á skipaflutninga til og frá landinu

„Saga Eimskips er saga atvinnu- og viðskiptalífs, efnahags- og stjórnmála. Hún er ekki síst saga kraftmikilla einstaklinga sem áttu stóran þátt í að ryðja nútímanum braut á Íslandi,“ segir Gylfi ennfremur.