Ellen – ekki söngkonan

Hafnfirska húsmóðirin Ellen Kristjánsdóttir er ekki söngkonan margfræga. Það þurfti hún að ítreka í símaskránni.



„Frá því ég var tíu ára hefur síminn hringt stöðugt vegna misskilnings um að ég væri söngkonan Ellen Kristjánsdóttir,“ segir Ellen Kristjánsdóttir, húsmóðir í fæðingarorlofi.

Í símaskrá er ritað „ekki söngkonan“ á eftir nafni Ellenar og þannig hefur það verið í tvö ár.

„Fyrir misgáning hef ég verið beðin um að koma í viðtöl og fengið símtöl frá aðdáendum en mér þótti erfiðast að taka á móti símtölum frá syrgjandi fólki sem bað mig að syngja í jarðarförum og útskýra fyrir þeim að þeir hefðu hringt í vitlausa Ellen.“

Síminn þagnaði hjá Ellen eftir að hún breytti skráningunni.

„Þegar ég fór fram á þessa breytingu hjá já.is uppskar ég mikinn hlátur því þetta þótti sniðugt. Ég hafði áður reynt að hafa starfsheiti mitt fyrir aftan nafnið en fólk hringdi eftir sem áður og spurði hvort ég væri frænka söngkonunnar, skírð í höfuðið á henni eða gæti haft milligöngu um samband við hana,“ segir Ellen og hlær dátt.



Góðlátlegt grín

Ellen á ellefu ára son, níu mánaða dóttur og tvö stjúpbörn, sjö og tíu ára, sem henni eru kær. Hún hefur undanfarin níu ár starfað sem verslunarstjóri hjá KFC en er nú í atvinnuleit.

„Mig langar að breyta til og prófa eitthvað nýtt þótt KFC sé æðislegur vinnustaður hjá frábærum vinnuveitendum sem gera mjög vel við sitt fólk.“

Áður en Ellen fór til KFC vann hún í Fjarðarkaupi með hressu fólki.

„Einn daginn kallaði verslunarstjórinn í hátalarakerfið: „Ellen Kristjánsdóttir! Ellen Kristjánsdóttir! Vinsamlegast komdu inn á skrifstofu.“ Þegar ég kom þangað var ég auðvitað beðin um að taka lagið við mikla kátínu viðstaddra,“ segir Ellen um góðlátlegt grínið, sem hefur fylgt henni lengi vegna nafnaruglingsins.

„Ég hef líka fengið símtöl um miðjar nætur og minnisstætt þegar eldri maður hringdi og sagðist eiga allar plöturnar mínar. Ég tjáði honum að ég væri ekki söngkonan en hann svaraði því til að ég segði nú bara svo vegna þess að hann væri með þetta ónæði og bað mig að skila kærri kveðju til KK bróður míns.“

Sættist við nafnið

Ellen hefur aldrei farið á tónleika með nöfnu sinni.

„Mér hefur alltaf þótt Ellen vera góð og sérstök söngkona, með sinn eigin söngstíl sem er engum líkur. Ég hef einkum yndi af söng þeirra systkina, Ellenar og KK, og fékk jólaplötu þeirra í jólagjöf frá kallinum mínum, en uppáhaldslagið með Ellen er „When I think of angels“.“

Þegar Ellen var telpa varð hún stundum þreytt á ruglingnum.

„Þá spurði ég mömmu af hverju í ósköpunum hún hefði látið skíra mig þessu nafni en mamma gerði bara gott úr því enda hafði hún valið mér nafnið vegna fegurðar þess. Í dag mundi ég heldur ekki vilja breyta því.“

Ellen og Ellen

Blaðamaður hafði samband við Ellen Kristjánsdóttur söngkonu sem hafði samúð með nöfnu sinni en gladdist yfir tilvist hennar, bað fyrir kveðju til hennar og bauð henni á tónleika um aðra helgi. Þá verður Ellen, ásamt eiginmanninum Eyþóri Gunnarssyni og dætrunum Sigríði, Elísabetu og Elínu með tónleika í Landnámssetrinu, Borgarnesi, föstudaginn 14. mars og á Café Rósenberg laugardaginn 15. mars.

Þó öll hafi þau tónlist að aðalstarfi er sjaldgæft að þau komi saman fram á tónleikum. Systurnar hafa að undanförnu gert víðreist með hljómsveit sinni, Sísý Ey, og Eyþór sinnir tónlistarstörfum heima og erlendis, meðal annars með hljómsveitinni Mezzoforte. Á efnisskrá eru lög úr ýmsum áttum, frumsamin og tökulög.

Miðapantanir eru hjá Landnámssetrinu og á Café Rósenberg.