Angel Care veldur dauðsföllum: Svona tryggir þú öryggi barnsins þíns

Margir foreldrar kannast við Angel Care tækið, sem vaktar andardrátt, hjartslátt og hreyfingar barna þegar þau sofa. Komið hefur í ljós að tækið getur skapað hengingarhættu sé rangt farið með það og hafa tvö bandarísk börn látið lífið vegna þessa.

600 þúsund tæki voru innkölluð ytra og hefur Neytendastofa nú vakið athygli átilkynningu VL heildverslunar, þar sem fram kemur að snúra úr skynjaraplötu sem sett er undir dýnu í barnarúmi geti valdið hengingarhættu nái barn taki á snúrunni.

17 mánaða íslensk stúlka komst nýlega í þessar aðstæður. „Við komum að henni þegar hún var búin að ná í snúruna sem er tengd við skynjaraplötuna sem er undir dýnunni og hún var búin að snúa henni utan um sig,“ segir Arnþór Birkisson, faðir stúlkunnar.

Hann segir tilhugsunina um hvað hefði getað gerst mjög óþægilega. „Þegar maður fór að hugsa út í þetta í þessu samhengi, að hún var með snúruna og að börn hafa dáið vegna þessa; það var mjög óþægilegt.“

Hvernig getur fólk komið í veg fyrir að þessi tæki skapi hættu?

„Með því fyrst og fremst að fara eftir leiðbeiningunum. Þar kemur skýrt fram að vefja skuli snúrunni í kringum rúmfótinn og  tengja hana svo meðfram gólfinu og í móðurstöðina,“ segir Lára Sigurðardóttir, eigandi VL heildverslunar, sem er umboðsaðili Angel Care hér á landi.

Einnig sé mikilvægt að ekki sé slaki á snúrunni og að móðurstöðin sé í minnst eins metra fjarlægð frá plötunni. Þá fæst nú ókeypis öryggishlíf. „Öryggishlífin mun fylgja öllum tækjum frá og með febrúar 2014 en fram að þeim tíma geta notendur tækisins sótt þessa öryggishlíf á alla sölustaði Angel Care á Íslandi,“ segir Lára.

Með réttri notkun getur tækið komið í veg fyrir slys og Arnþór hyggst nota það áfram. „Þetta er mjög gott tæki sem býður upp á marga öryggiseiginleika sem er gott fyrir alla foreldra að hafa,“ segir hann.