Myndband á jökli bjargaði hjónabandi

„Við skutum þar til ég gat ekki líkamlega haldið áfram vegna kulda, sársauka og ógleði. Undir lokin var ég full vonar,“ segir listakonan Kitty-Von Sometime, sem skaut afar persónulegt myndband á Langjökli í seinasta mánuði.

Myndbandið OPUS/YOU AGAIN var samstarf með hljómsveitinni Árstíðum sem gerði tónlistina. Það er lofgjörð til eiginkonu Kitty, bandarísku söngkonunnar Yes Alexander, sem hafði farið frá henni nokkrum mánuðum áður. Þau tóku saman aftur eftir að Alexander hafði séð myndbandið.

„Myndin var leið til að tjá eiginkonu minni ákveðna hluti um sjálfan mig. Við höfðum gengið í gegnum gríðarlega erfiðar breytingar í sambandinu sem við náðum ekki að ráða við,“ segir Kitty. „Ég komst að því að með listinni minni get ég látið meira í ljós heldur en í gegnum önnur samskipti.“ 

Myndbandið er ansi sláandi en þar má sjá Kitty gangandi á Langjökli íklædd kjól sem var meðal annars gerður úr eina krónum. Einnig er hún klædd hálsbandi sem er í laginu eins og kyrkjandi hendur. Í myndbandinu finnur hún ísskúlptúr af svani sem hún brýtur í lokin og endurheimtir „hjartað sitt endurfætt“ sem var fast inni í skúlptúrnum. 

„Ég bar með mér margra mánuða missi upp á jökul og umkringd þögn tökuliðsins leyfði ég sársaukanum að yfirtaka mig,“ segir listakonan og bætir við að þetta sé áhrifamesta verk sem hún hefur látið frá sér.

Kitty segir það hafa verið mikið þrekvirki að taka upp á Langjökli. „Undirbúningur fyrir tökurnar tók miklu lengri tíma en vanalega þar sem bókstaflega hvert skref þurfti að vera reiknað út vegna bráðnunarstigs jökulsins,“ segir hún. „Veðrið var óvenjulega viðráðanlegt og það varð ekki alltof kalt þangað til að sólin hvarf um eftirmiðdegi. Þá lét sársaukinn til sín taka þar sem hitinn lækkaði svo snarlega.“

Hún er nú stödd í Los Angeles þar sem hún hefur fundað stíft bæði um nýja þætti fyrir listahópinn The Weird Girls og vegna heimildarmyndarinnar I Want To Be Weird eftir Brynju Dögg Friðriksdóttur sem fjallar um Kitty og störf hennar með hópnum seinustu fjögur árin. Myndin kemur út snemma á næsta ári. Þá verður samansafn af verkum Kitty sýnd í Bretlandi í næsta mánuði á kvikmyndahátíð tileinkaðri Skandinavíu.

OPUS / YOU AGAIN from Kitty Von-Sometime on Vimeo.