Kennileiti borgarinnar í ævintýraljóma

„Myndirnar eru sambland af grafískri hönnun og ljósmyndun,“ segir Elsa Nielsen, grafískur hönnuður og myndlistarmaður, um sýninguna Borgin mín sem hún opnaði nýverið á kaffihúsinu Mokka.

Myndefnið er borgarbúum kunnuglegt, en þó framandlegt því Elsa ljær ýmsum kennileitum borgarinnar býsna ævintýralegan ljóma. Hugmyndina að verkefninu fékk hún eftir að hafa með sama hætti sett nokkur kennileiti Seltjarnarness í nýjan búning og sýnt á Eiðisskeri á HönnunarMars.

„Ég læt ímyndunaraflið ráða för, mái út mörk hins raunverulega og hins óraunverulega með stafrænni tækni þar sem margar ljósmyndir eru skeyttar saman í eina heild,“ útskýrir Elsa.

Hún tekur sjálf myndirnar, fer á vettvang og finnur gjarnan óvenjulegt sjónarhorn, til dæmis myndaði hún Hörpu frá báti. Einnig er mismunandi hvort hún hugsar sér útfærsluna áður en hún myndar viðfangsefnið eða á eftir. Allt eftir því hvernig hugrenningatengslin eru. Í endanlegri útfærslu varð Hallgrímskirkju að Stuðlakirkju, Skólavörðustígur að Skólavörðugíg, Perlan að Diskóperlu og Viðey að Friðey.