KR gæti misst fyrirliðann sinn í atvinnumennsku

Baldur Sigurðsson, fyrirliði KR, gæti verið á förum frá félaginu, en honum þykir ekki ólíklegt að hann fái samningstilboð frá danska úrvalsdeildarliðinu SönderjyskE.

Baldur, sem hefur verið einn af langbestu leikmönnum Pepsi-deildarinnar undanfarin ár, var á reynslu hjá liðinu í síðustu viku og stóð sig vel. Hann skoraði t.a.m. í varaliðsleik á meðan dvöl hans stóð.

„Ég á von á símtali að utan á næstu dögum og þá kemur þetta betur ljós. Þetta gekk mjög vel og viðbrögðin frá þeim voru býsna jákvæð. Ég á alveg eins von á því að fá samningstilboð frá þeim og svo tökum við stöðuna,“ segir Baldur við fótbolti.net sem greinir frá.

Baldur er nýbúinn með verkfræðinám og kominn í draumavinnuna að eigin sögn og þá á hann von á barni í byrjun nýs árs. „Það er margt sem þarf að huga að og þetta er stór ákvörðun,“ segir Baldur Sigurðsson.

Brotthvarf Baldurs yrði mikið áfall fyrir KR sem ætlar að láta Farid Zato fara og þá tapaði liðið fyrir FH í baráttunni um Finn Orra Margeirsson.