Framkoma Íslands á alþjóðavettvangi til skammar

Bjarni Benediktsson, formaður Sjálfstæðisflokksins, ávarpaði gesti á opnum fundi sem hann hélt í Valhöll í morgun. Hann hóf ræðu sína á því að benda á að 105 dagar væru nú til kosninga. Í síðustu kosningum hafi þjóðin kosið yfir sig vinstri stjórn og í kjölfarið fengið það versta úr báðum stjórnarflokkum: utanríkisstefnu Samfylkingar og atvinnustefnu Vinstri-grænna.

„Í stað þess að hvetja almenning og atvinnulífið áfram, og standa með heimilum og fyrirtækjum, voru auknar byrðar lagðar á alla," sagði Bjarni. „Okkar helsta gagnrýni á efnahagsáætlun ríkisstjórnarinnar var gert væri ráð fyrir allt of miklum skattahækkunum en það var ekki að því að spyrja - ríkisstjórnin gekk á endanum miklu lengra í skattahækkunum en nokkurn óraði fyrir."

Þá sagði Bjarni að samningaviðræður Íslands og Evrópusambandsins væru byggðar á pólitískum hrossakaupum en ekki sameiginlegri sýn eða stefnu. Hann benti á að engin EFTA þjóð hafi verið lengur í aðildarviðræðum en Ísland. „Samt hefur einungis 11 af 35 samningsköflum verið lokað eða innan við einum þriðja. Einhver kynni að spyrja: Og um hvað var samið í þessum 11 köflum? Að hlíta löggjöf ESB. Ekkert annað." sagði Bjarni.

„Þegar ég ræði þessa hlið málsins, þessa pólitísku stöðu í ESB málinu á Íslandi, við kollega á öðrum þjóðþingum, missa þeir hreinlega andlitið, enda er þessi framkoma á alþjóðavettvangi til skammar."

Þá ítrekaði Bjarni að stjórnvöldum hér á landi væri skylt að tryggja að lífskjör hér á landi verði með því besta sem gerist í heiminum.

„Við ætlum ekki að lofa fólki að það verði ókeypis í sund í ágúst og frítt í strætó í október," sagði Bjarni. „Við ætlum að hugsa til langs tíma, sjá til þess að fólk vilji áfram búa á Íslandi og að þeir sem hafi flutt sjái sér fært að koma heim aftur."

„Við munum ekki líða dulda skattheimtu, sem með sama áframhaldi gæti orðið að sérstakri og viðurkenndri keppnisgrein milli vinstri flokkanna. Við ætlum að leggja áherslu á frelsi og athafnagleði, - byggja á hugviti og sköpunarkrafti - og við ætlum að lofa fólki því að eftir ár geti það litið til baka og sagt að þessu ári hafi verið vel varið."