Hefur svarað 200 fyrirspurnum vegna hótana á netinu

Lögreglan á höfuðborgarsvæðinu hefur svarað um 200 fyrirspurnum um hótanir á netinu á síðastliðnum mánuðum, samkvæmt viðtali við Þórir Ingvarsson rannsóknarlögreglumann, sem rætt var við í morgunútvarpi Rásar 2 í dag.

Hann sagði að töluvert væri um það að fólk setti sig í samband við lögregluna vegna hótana og vafasams efnis sem það sér á netinu, til dæmis á samskiptasíðum á borð við Facebook.

Lögreglan á höfuðborgarsvæðinu er sjálf með síðu á Facebook og fær margar tilkynningar þar í gegn.

Þórir segir í samtali við RÚV að sumir þeirra sem setja sig í samband við lögreglu bendi á efni sem þeim finnst vafasamt, aðrir kæra eitthvað sem beinist að þeim sjálfum, og stundum vill fólk fá á hreint hvort ákveðið efni sé löglegt eða ólöglegt. Og gráa svæðið er gríðarlega umfangsmikið á netinu að mati Þóris.

Talsvert er um ábendingar vegna skrifa hópa og einstaklinga á Facebook. Oft þannig að fólk vilji losna við efni þaðan. Þórir telur Facebook oftast bregðast vel við en segir að svo virðist að því fleiri sem tilkynna efni til Facebook því meiri líkur séu á að Facebook fjarlægi efnið.

Morgunútvarpið ræddi meðal annars við Þóri vegna sérkennilegs máls sem kom upp á Facebook á dögunum, þar sem óprúttin aðili, sem hélt úti síðunni „Karlar eru betri en konur" breytti mynd af nemanum Þórlaugu Ágústsdóttur, með þeim hætti að hún virtist vera með áverka eftir ofbeldi. Á myndinni stóð svo: „Konur eru eins og gras, það það þarf að slá þær reglulega."

Síðan gerir út á niðrandi grín á kostnað kvenna.

Þórlaug kvartaði til Facebook út af málinu, en fékk þau svör að myndin bryti ekki í bága við reglur Facebook.Síðunni hefur verið lokað núna. Ekki er vitað hver stendur á bak við hana.

Þá hefur femínistinn Hildur Lilliendahl oft barist við Facebook en sjálf hefur hún tvisvar verið sett í bann frá síðunni, meðal annars eftir að hún birti ummæli manns sem sagðist vilja keyra og bakka aftur yfir hana.