Óvissa með framtíð unglingaheimilis

Íbúar í nágrenni húss við Fjóluhvamm í Hafnarfirði kvörtuðu til bæjaryfirvalda yfir atvinnustarfsemi í húsinu, en það er nú leigt til Vinakots fyrir vistun unglinga með hegðunarvanda. Skipulagsfulltrúi Hafnarfjarðar telur starfsemina í ósamræmi við aðalskipulag.

Óánægja íbúanna beinist ekki að starfsemi unglingaheimilisins sem slíks, heldur því að eigandi hússins hafi ítrekað getað haldið úti atvinnustarfsemi í íbúðargötu en í húsinu var áður frönsk ferðaskrifstofa sem þeir segja að hafi haft ónæði í för með sér. Þá eru íbúarnir ósáttir við að bæjaryfirvöld hafi ekki kynnt fyrir þeim tilvonandi starfsemi í húsinu, heldur hafi þeir uppgötvað tilvist Vinakots þegar lögregla hafi tekið að venja komur sínar í götuna í tengslum við starfsemina. Íbúarnir vilja að þeirra réttar sé gætt og farið að lögum en segja að verði unglingaheimilið skilgreint þannig að það eigi heima í íbúabyggð muni þeir taka því vel.

Í svari skipulagsfulltrúa Hafnarfjarðar við erindi íbúanna kom fram að hann teldi starfsemina í húsinu í ósamræmi við Aðalskipulag Hafnarfjarðar. „Jú, það er mín persónulega skoðun sem skipulagsfræðingur að ég tel að þetta sé stofnun. Það er að vísu mikið álitamál og lögfræðingar ekki sammála um það hvort þetta sé stofnun eða íbúðarhúsnæði en sé þetta stofnun eiga þær almennt ekki heima á íbúðasvæðum,“ segir Bjarki Jóhannesson, skipulagsfulltrúi Hafnarfjarðar.

Rekstraraðilar Vinakots segja öll tilskilin leyfi til staðar fyrir starfseminni. „ Ja, bærinn hefur ekki gefið nein leyfi fyrir þessu og þetta mun ekki vera starfsleyfisskylt hjá heilbrigðisfulltrúa. Það var haft samband við félagsþjónustuna hér sem setti sig ekki upp á móti þessu en við erum eingöngu að rannsaka þetta út frá lagalegu hliðinni, sem sagt skipulagslögum,“ segir Bjarki.

Rekstraraðilar Vinakots vilja leysa málið með nágrönnum sínum og hyggjast halda kynningarfund. Málinu var vísað til lögfræðings en hann er í sumarleyfi og skipulags- og byggingarráð fundar næst í ágúst svo niðurstaða í málinu gæti dregist. Fréttastofa ræddi við eiganda hússins í dag. Hann kveðst ánægður með að hafa getað útvegað Vinakoti húsnæði en segir að húsið fari í hendur nýrra eigenda í haust. Ef Vinakot verður skilgreint sem íbúðarhúsnæði er framtíð þess í húsinu því undir nýjum eigendum komin.