Þekktist í Armeníu eftir aldarfjórðung

„Þetta var alveg stórkostlegt. Við vissum ekkert hvað átti að sýna okkur en svo kom í ljós að þetta var nákvæmlega sami bærinn og ég var staddur í fyrir 25 árum og nákvæmlega sami skóli sem hafði hrunið í skjálftanum," segir Þórir Guðmundsson, sviðsstjóri hjálparstarfssviðs Rauða kross Íslands og fyrrverandi fréttamaður.

Í byrjun árs 1989 fór Þórir til armensku fjallaborgarinnar Leninakan sem fréttamaður Stöðvar 2 stuttu eftir að öflugur jarðskjálfti reið yfir svæðið með þeim afleiðingum að meira en fimmtíu þúsund létu lífið, meðal annars nær öll börn og kennarar úr grunnskóla sem gjöreyðilagðist.

Þórir greindi frá heimsókninni á Facebook-síðu sinni í gær. Hann er nú á ný staddur í Armeníu ásamt fleiri Íslendingum fyrir hönd Rauða krossins og heimsótti þar skóla í gær í borginni Gyumri, sem áður hét Leninakan. Samtökin eru að aðstoða heimafólkið við að búa sig undir og verjast ýmissi náttúruvá sem herjað getur á löndin. Aðstæður þar eru svipaðar og hér á landi, það er að segja mestu hætturnar eru ofanflóð og jarðskjálftar, útskýrir Þórir. Vegna þeirra verkefna var komið við í skóla í Gyumri á leið þeirra til Tíblisi, höfuðborgar Georgíu.

Í skólanum ræddi Þórir við skólastjórann um hjálparstarf tengt jarðskjálftum í svæðinu sem yrði stutt af Rauða krossi Íslands. Hann komst fljótt að því að þetta var nákvæmlega sami skóli og hann hafði heimsótt stuttu eftir hamfarirnar 1989.

„Við ræddum við fólkið og nemendurna um viðbragðsáætlanir. Svo þegar ég er að ganga út kemur upp að mér miðaldra kona og segir: „Ég hef séð þig áður!" Hún mundi eftir mér frá því ég var hér sem fréttamaður," segir hann. „Þetta er afskaplega lítill heimur og búinn að vera ótrúlegur dagur."

Skólinn var endurbyggður með fjármagni sem fékkst með því að selja úr landi málverk og teikningar sem fundust í rústum skólans eftir að skjálftinn reið yfir.