Fimm í varðhaldi vegna umfangsmikils fíkniefnasmygls

Fimm karlmenn sæta gæsluvarðhaldi vegna umfangsmikils fíkniefnamáls sem er til rannsóknar hjá lögreglunni á höfuðborgarsvæðinu. Í síðustu viku var lagt hald á verulagt magn af því sem talið er vera sterk fíkniefni. Það voru starfsmenn tollyfirvalda, með aðstoð fíkniefnaleitarhunda, sem fundu efnin, en þau voru send í nokkrum póstsendingum til landsins.

Nokkrir hafa verið handteknir í þágu rannsóknarinnar, en á föstudag á síðustu viku voru tveir karlar á fertugsaldri úrskurðaðir í tveggja vikna gæsluvarðhald, eða til 8. febrúar, á grundvelli rannsóknarhagsmuna. Þrír karlar til viðbótar, einn á þrítugsaldri og tveir á fimmtugsaldri, voru handteknir fyrr í vikunni og voru þeir úrskurðaðir í gæsluvarðhald til 7. febrúar. Flestir fimmmenninganna hafa áður komið við sögu hjá lögreglu, mismikið þó.

Í tilkynningu frá lögreglunni segir að ekki sé hægt að veita frekari upplýsingar um málið að svo stöddu, en það er unnið í samvinnu við dönsk lögregluyfirvöld. Við aðgerðirnar hefur lögreglan á höfuðborgarsvæðinu jafnframt notið aðstoðar sérsveitar ríkislögreglustjóra.