Umboðsmanni skuldara var óheimilt miðla upplýsingum skuldara

Starfsmanni Umboðsmanns skuldara var óheimilt að miðla persónuupplýsingum skjólstæðings síns til félagsþjónustunnar í Hafnarfirði í júní á síðasta ári, samkvæmt úrskurði Persónuverndar sem birtist á vef stofnunarinnar í dag.

Í kvörtuninni kom meðal annars fram að starfsmaður umboðsmanns skuldara hefði sent starfsmanni Fjölskylduþjónustunni í Hafnarfirði tölvupóst sem innihélt upplýsingar um að kvartandi hefði hlotið greiðslu fyrir tímabundna örorku frá Tryggingarstofnun ríkisins á sérstaklega tilgreindu tímabili, upphæð greiðslu og heildarupphæð greiðslna.

Kvartandi var ósáttur við þessa miðlun og taldi hana óheimila.

Í skýringum Umboðsmanns skuldara kom fram að umræddur tölvupóstur starfsmanns umboðsmanns skuldara var liður í því að afla upplýsinga um líklegar framtíðartekjur viðkomandi. Því miður urðu starfsmanni umboðsmanns á mistök við sendingu tölvupóstsins og komu þar fram upplýsingar sem starfsmanninum var ekki heimilt að veita utanaðkomandi aðila.

Umboðsmaður skuldara viðurkenndi því að starfsmanni hans hafi ekki verið heimilt að senda umræddar upplýsingar til starfsmanns Fjölskylduþjónustu Hafnarfjarðar. Þá hafi umboðsmaður farið yfir verkferla sína og fundað með starfsmönnum sínum vegna málsins og þeim verði kynntir verkferlar með ítarlegum hætti til að koma í veg fyrir að sambærileg mistök verði gerð aftur.

Persónuvernd aðhefst því ekki frekar í málinu.