Styrmir Þór sýknaður í Exeter-málinu

Styrmir Þór Bragason, fyrrverandi forstjóri MP banka, var sýknaður í Héraðsdómi Reykjavíkur í dag af ákæru um umboðssvik vegna svokallaðrar Exeter fléttu. Allur málskostnaður fellur á ríkissjóð.

Málið snerist um 1100 milljóna króna lán sem Byr veitti Exeter Holding á seinni hluta ársins 2008. Lánið var notað til þess að kaupa stofnfjárbréf af MP banka og tveimur stjórnarmönnum Byrs á yfirverði. Tveir menn, þeir Jón Þorsteinn Jónsson og Ragnar Z. Guðjónsson, höfðu áður hlotið fjögurra og hálfs árs fangelsisdóm fyrir sinn þátt í málinu.

Styrmir Þór sagði eftir dóminn að hann hafi aldrei skilið ákæruna og niðurstaða dómsins sé í takti við það sem hann hafi búist við. Þrjú og hálft ár af hans lífi hafi farið í þetta mál og Styrmir sagðist vonast til þess að geta farið að snúa sér að öðrum málum í framhaldinu.

Þetta er í annað sinn sem Héraðsdómur dæmir í málinu. Hæstiréttur felldi svo fangelsisdóma yfir þeim Jóni Þorsteini og Ragnari, en fól Héraðsdómi Reykjavíkur að taka málið aftur til efnislegrar meðferðar.