Álitin þunglynd en reyndist vera með krabbamein í ristli

Matthildur Kristmannsdóttir var álitin þunglynd þegar hún leitaði ítrekað til læknis vegna veikinda. Í viðtali við Fréttatímann, sem kemur út á morgun, kemur fram að þremur árum eftir að hún leitaði sér fyrst hjálpar kom í ljós að Matthildur var alls ekki þunglynd - heldur með krabbamein.

Í viðtali við Fréttatímann segir hún: „Það var alveg sama við hvaða lækni ég talaði, ég var bara álitin þunglynd," segir Matthildur Kristmannsdóttir, sem barðist í þrjú ár við erfið veikindi án þess að fá á þeim aðra skýringu en þá að hún væri þunglynd – sem hún vildi ekki samþykkja.

„Ég svaf stóran hluta sólarhringsins og gat alls ekki séð um mig sjálf. Ég fékk hinsvegar enga hjálp í kerfinu því ég var með þunglyndisgreiningu og átti í raun bara að rífa mig upp úr þunglyndinu og koma mér út í göngutúra. Ég stóð hinsvegar ekki á fótunum og þó svo að viljinn væri fyrir hendi gat ég einfaldlega ekki gengið," segir hún.

Margoft hringdi Matthildur á sjúkrabíl vegna mikilla kvala og fullkomins orkuleysis en fékk alltaf sömu meðferðina á bráðamóttökunni. „Ég var alltaf send heim aftur – þó svo að ég væri svo veik að ég gæti ekki annað en legið í rúminu hjálparlaus. Fjölskylda og vinir voru orðnir ráðalausir og tóku í raun sama pólinn í hæðina og læknarnir, héldu að ég ætti við alvarlegt þunglyndi að stríða. Ég var orðin alein. Það var eiginlega komið þannig fyrir mér að mig langaði til að deyja því enginn hlustaði á mig," segir Matthildur.

„Þegar ég loks fór í ristilspeglunina kom í ljós æxli í ristlinum sem var á stærð við appelsínu. Það var svo stórt að ristillinn var næstum alveg lokaður og myndavélin komst ekki framhjá því. Æxlið hafði því verið að vaxa þarna í 10-12 ár eftir því sem læknarnir sögðu og veikindi mín síðustu þrjú árin höfðu því stafað af því að ég var með stórt krabbameinsæxli í ristli," segir Matthildur. Viðtalið í heild sinni má nálgast hér.