Tvö íslensk tónskáld gætu keppt um Óskarsverðlaunin

Tvö íslensk tónskáld, Atli Örvarsson og Jóhann Jóhannsson, eiga verk á lista yfir 114 bestu kvikmyndatónverk ársins sem birtur var á hinni virtu bandarísku vefsíðu Variety fyrir skömmu.

Atli er tilnefndur fyrir tónverk sín í kvikmyndunum The Mortal Instruments: City of Bones og Hansel & Gretel Witch Hunters og Jóhann fyrir tónverk sín í kvikmyndinni Prisoners, sem var ein vinsælasta kvikmynd ársins á Íslandi.

Á listanum er að finna nokkur af virtustu og þekktustu tónskáldum samtímans líkt og John Williams, James Newton Howard, Danny Elfman, Howard Shore og Hans Zimmer svo nokkrir séu nefndir.

Þessi 114 tónverk keppast um að fá tilnefningu til Óskarsverðlauna fyrir bestu kvikmyndatónlistina en aðeins fimm kvikmyndir komast í tilnefningapottinn.

Tilnefningarnar verða kynntar hinn 16. janúar næstkomandi. 86. Óskarsverðlaunahátíðin fer fram 2. mars í Dolby Theatre í Los Angeles.