#TeamNigella

Undanfarnar vikur hafa réttarhöld yfir Fransescu og Elisabettu Grillo, aðstoðarkonum bresku matseljunnar Nigellu Lawson og breska athafnamannsins Charles Saatchi sem er hvað best þekktur fyrir að vera listaverkasafnari og eigandi Saatchi-gallerísins, staðið yfir.

Nigella og Charles eru skilin að skiptum.

Réttarhöldin tóku snemma óvænta stefnu og hafa breyst í vettvang þar sem skilnaðardeilur Saatchi og Lawson fara fram opinberlega. Þá hefur Charles Saatchi lagt fram röð alvarlegra ásakana á hendur Nigellu.

Meint eiturlyfjaneysla

Lögfræðingar Grillo-systranna halda því fram að Nigella hafi gefið þeim skilyrðislaust leyfi til þess að eyða rúmlega 130 milljónum króna yfir fjögurra ára skeið af fyrirtækjakorti Nigellu og Saatchi í flug, tískuvarning, hótelgistingar og lúxusvörur til einkanota.

Gegn þessu, halda lögfræðingar systranna fram, áttu þær að halda trúnaði við Nigellu og segja ekki frá meintum vímuefnavanda Nigellu, en systurnar halda því fram að Nigella noti kókaín, marijuana og lyfseðilsskyld lyf í óhófi.

Nigellu var lýst sem daglegum neytenda kókaíns sem gæfi dóttur sinni eiturlyf.

Tölvupóstur lak í fjölmiðla

Þessum ásökunum var svo gefinn byr undir báða vængi þegar tölvupósti frá Saatchi var lekið til fjölmiðla þar sem hann kallaði fyrrverandi eiginkonu sína „Higella.“ 

Í réttarsalnum sagðist hann enn fremur trúa öllu því sem ákærðu héldu fram um eiturlyfjaneyslu Nigellu. Þegar Saatchi var sjálfur kallaður til vitnis var hann þó ekki jafn viss í sinni sök. 

„Ef þú ert að spyrja mig hvort ég viti fyrir víst að Nigella hafi verið að taka eiturlyf, er svarið nei.“

Hann sagðist jafnframt vera miður sín að persónulegur tölvupóstur hans til Nigellu hefði lekið í fjölmiðla, þar sem hann sagði að hún væri „algjörlega farin“ af eiturlyfjaneyslu.

Hann sagðist einnig sjá eftir Nigellu, sem hann segist „dýrka af öllu hjarta,“ og að hann óskaði þess að allt síðasta ár hefði aldrei átt sér stað.

Viðurkenndi neyslu

Nigella neitar því að eiga við fíkniefnavanda að stríða en viðurkennir að hafa tekið efnin yfir tvö tímabil í lífi sínu. Þegar fyrrum eiginmaður hennar, John Diamond, var veikur af krabbameini, en hún sagði vímuna af efninu hafa veitt honum ákveðið frelsi. Svo aftur í júlí 2010 með Saatchi. 

Nigella lét þær fá kortin

Saatchi sagði það hafa verið hugmynd Nigellu að láta systurnar hafa kreditkort þar sem þær sáu um innkaup fyrir heimilið og var það hluti af starfi þeirra sem aðstoðarkonur.

Þá neitaði hann því að Nigella hefði nokkurn tímann leyft starfsfólki þeirra að eyða peningum hjónanna að vild.

Systurnar hafa einnig haldið því fram að Nigella hafi komið fram við þær eins og þræla og sagt að komið hafi verið fram við þær með verri hætti en filippseyska þræla. Saatchi sagði það af og frá, hann sagði Nigellu mjög góðan vinnuveitanda og að starfsmenn þeirra hafi dýrkað hana.

Saatchi, sem er sjötugur, var gefin viðvörun frá lögreglu eftir frægt atvik á Scott‘s Restaurant í Mayfair-hverfi í London í júní, þar sem Saatchi tók þáverandi eiginkonu sína hálstaki. Lögfræðingar ákærðu vilja nú meina að það hafi verið vegna meints samnings Nigellu við Grillo systurnar um þagmælsku þeirra. 

Þegar bornar voru upp á Saatchi myndir af þeim á veitingastaðnum frá því í sumar þar sem virðist sem hann taki Nigellu hálstaki sagði Saatchi að hann hefði hvorki verið að kyrkja Nigellu né meiða hana með öðrum hætti:

„Ég hélt höfði hennar upp með því að halda um háls hennar og láta hana einbeita sér,“ sagði Saatchi.

Nýtur stuðnings almennings

Þetta allt kemur á viðkvæmum tíma fyrir feril matseljunnar, þar sem hún hafði fyrirætlanir um að reyna fyrir sér á Bandaríkjamarkaði á þessu ári - meira að segja hafa verið sögusagnir þess efnis að hún hyggðist flytja til Los Angeles.

Þó virðast réttarhöldin ekki hafa haft alneikvæð áhrif á ímynd Nigellu, því að margir hafa lýst yfir opinberum stuðningi við Nigellu Lawson, til dæmis með kassmerkinu #TeamNigella.

Stuðningsmenn hennar á netinu eru fólk á borð við Matt Lucas, Jemima Khan, Stephen Fry og David Cameron, forsætisráðherra Bretlands.

Elisabetta og Francesca Grillo

Grillo-systurnar hafa verið hluti af fjölskyldu Nigellu lengur en hjónaband hennar við Charles Saatchi hefur staðið yfir. Elisabetta, 41, sem Nigella kallar Lisu hóf störf fyrir matseljuna sem aðstoðarkona hennar þegar fyrsti eiginmaður Nigellu, blaðamaðurinn John Diamond, var enn á lífi.

Þegar Nigella svo giftist Charles Saatchi, árið 2003, var Francescu bætt á launaskrá fjölskyldunnar.

Hlutverk systranna var að sjá til þess að heimilishaldið gengi stóráfallalaust fyrir sig. Þær voru sérstaklega nánar börnum Nigellu, Cosimu og Bruno, og dóttur Saatchis, Phoebe.

Nigella tileinkaði systrunum meira að segja uppskriftabók: Mínar hjartnæmustu þakkir til trúnaðarvinkvenna minna í eldhúsinu: Lisu og Francesu Grillo.

Fyrir um tveimur vikum hófust réttarhöld yfir aðstoðarkonunum tveimur þar sem þær eru sakaðar um að draga sér fé, rúmlega 130 milljónir, af yfirmönnum sínum. Þær neita öllum ásökunum.

Rahul Gajjar, fjármálastjóri Saatchis, sagði í síðustu viku fyrir rétti að Francesca hefði eytt að meðaltali rúmlega níu milljónum á mánuði á kreditkort yfirmanna sinna og systir hennar ríflega fimm milljónum.

Hann fór yfir útgjöld systranna í júní síðastliðnum, Francesca eyddi þá tæpri milljón í flug til New York. Á meðan á dvöl hennar stóð eyddi hún rúmlega 350 þúsund krónum í tískuvöruversluninni Miu Miu.

Í París greiddi hún 350 þúsund króna reikning á Ritz hótelinu þar í borg og á sama degi keypti hún Chloé kjól fyrir 138 þúsund krónur. Þann 12. júní eyddi hún rúmri milljón í Miu Miu og um það bil hálfri milljón í Prada.

Þrátt fyrir að laun systranna væru hófleg, Francesca fékk greidd í árslaun um það bil 5,3 milljónir og systir hennar 4,8 milljónir, voru fríðindin talsverð og þeim var skaffað húsnæði.

Þær höfðu aðgang að reikningi fyrir leigubíla og var flogið um allan heim í fyrsta farrými. Ef að Charles, til að mynda, þurfti að ná í verk til New York voru það Grillo-systurnar sem voru sendar til að ná í verkið.

Nigella Lawson

Líf Nigellu Lawson, sem er nú 53 ára gömul, hefur ekki alltaf verið dans á rósum.

Hún ólst upp með allt til alls. Faðir hennar, Nigel Lawson, var stjórnmálamaður og gegndi meðal annars embætti fjármálaráðherra Bretlands frá 1983-1989.

Móðir hennar, Vanessa Lawson var af ríkum ættum. Þau áttu íburðarmikil og falleg heimili í dýru hverfunum í Chelsea og í Kensington í London. En Nigella var vansæl.

Hún þurfti að flytja níu sinnum á milli skóla á aldrinum 9 til 18 ára.

Vanessa, móðir hennar, var þunglyndissjúklingur og beitti Nigellu ofbeldi þegar hún fékk skyndileg bræðisköst. Það var ekki fyrr en Nigella var orðin fullorðin sem samband mæðgnana lagaðist. Nokkrum árum síðar lést Vanessa úr lifrarkrabbameini. Hún var aðeins 48 ára gömul.

Árið 1993 missti Nigella systur sína, Thomasinu, úr brjóstakrabbameini. Hún var rúmlega þrítug þegar hún lést.

Hún vann úr þeirri sorg með hjálp þáverandi eiginmanns síns, John Diamond, sem hún giftist árið 1992. Hann var greindur með krabbamein í hálsi árið 1997 og dó árið 2001, aðeins 47 ára gamall.

Þegar hún svo varð ástfangin af Charles Saatchi vonuðu vinir og vandamenn að bjartari tímar væru framundan fyrir Nigellu.

Þegar myndir svo náðust af Saatchi með hendurnar um háls Nigellu á veitingastað í Mayfair í sumar fór allt í bál og brand. Umræðan um atvikið varð svo mikil að það hleypti af stað þjóðarumræðu um heimilisofbeldi.

Nigella hefur enn ekki talað um réttarhöldin eða atvikið á veitingastaðnum í Mayfair í sumar utan réttarhaldanna, en hefur skrifað undir samning þess efnis að fara í viðtal til spjallþáttadrottningarinnar Opruh snemma á næsta ári þar sem hún kemur til með að segja sína hlið málsins.