Vík Prjónsdóttir hönnunarteymið meikar það í New York

Hönnunarteymið Vík Prjónsdóttir vekur athygli í New York og er stór umfjöllun í hönnunartímariti New York Magazine, Global Design, sem kom út fyrir stuttu.



Hönnunarteymið Vík Prjónsdóttir hefur verið valið af hönnunartímariti New York Magazine sem einn af áhugaverðustu hönnunarhópum í hinu alþjóðlega hönnunarsamhengi. Hönnunartímaritið, sem nefnist Global Design, er gefið út einu sinni á ári og að þessu sinni er lögð rík áhersla á unga hönnuði á heimsvísu. „Blaðamaður hafði samband við okkur og tilkynnti að það væri verið að fókusera á okkur í þessum kafla í blaðinu sem „collective designers“. Hún var þá búin að grafa okkur upp, sem er ótrúlega mikill heiður, og það er æðislegt að fá svona viðurkenningu,“ segir Guðfinna Mjöll Magnúsdóttir, ein hönnuðanna þriggja frá Vík Prjónsdóttur.

Á bak við Vík Prjónsdóttur eru þær Þuríður Rós Sigþórsdóttir og Brynhildur Pálsdóttir ásamt Guðfinnu. Í tímaritinu Global Design er rætt við Þuríði Rós, sem býr í New York, og segir hún frá því hvernig nokkrir vöru-og tískuhönnuðir tóku höndum saman árið 2005 þegar mikil hnignun var á íslenskum ullarmarkaði og ákváðu að vinna verkefni með íslenskri ullarverksmiðju og búa til nýtískulegri ullarvörur.

Innblásturinn fengu þær víðs vegar um Ísland og úr íslenskum sögum. Nú átta árum síðan er ullarmarkaðurinn sprunginn og Vík Prjónsdóttir er fyrirtæki í örum vexti. Guðfinna Mjöll segir Bandaríkin alltaf hafa haft mikinn áhuga á vörunum en að hinn íslenski markaður skipti þær miklu máli. Umfjöllunina segir hún koma á besta tíma þar sem Sjávarteppi Víkur eru að fara í sölu hjá bandarísku keðjunni Anthropologie, sem rekur 175 verslanir víða um heim, en sú keðja er í eigu sömu aðila og Urban Outfitters. Verslunin Geysir og verslunin SPARK á Klapparstíg eru meðal þeirra sem selja vörur frá Vík Prjónsdóttur hér á landi.