Tók fyrstu myndina ellefu ára af vinkonum

„Fyrsta myndin mín var örugglega af vinkonum mínum,“ segir Agnes Heiða Skúladóttir sem sigraði í ljósmyndakeppni Fréttablaðsins. Þemað var útivist. Sigurmyndin, sem Agnes tók í réttum í Grýtubakkahreppi, birtist á forsíðu blaðsins föstudaginn 4. október.

Agnes segist hafa tekið myndir síðan hún var ellefu ára gömul og það voru vinkonur hennar sem hún festi fyrst á filmu. Hún stofnaði ásamt vinkonum sínum ljósmyndaklúbbinn ÁLFkonur en hástafirnir standa fyrir „áhugaljósmyndarafélag“.

„Við erum átján í dag og erum búnar að halda ellefu til tólf samsýningar,“ segir Agnes. Aðspurð hvers vegna vinkonurnar hafi stofnað sérstakan ljósmyndaklúbb fyrir konur, svarar Agnes: „Okkur fannst bara fáar konur virkar.“

Ljósmyndirnar eru svo birtar á Facebook-síðu hópsins sem ber sama nafn. Þess má geta að samkeppni Fréttablaðsins um bestu haustmyndina lýkur nú í kvöld.