Skapandi vinkonur halda uppi blogginu Adulescentulus

Vinkonurnar Anna Maggý, Marta Hlín og Margrét Unnur fengu það skemmtilega verkefni í sumar að byrja tískublogg á vegum skapandi sumarstarfa í Kópavogi. Bloggið heitir því undarlega nafni Adulescentulus, sem er latína og merkir ungur maður, enda snýst bloggið um ungt fólk. Það sem einkennir bloggið er að það fjallar ekki um þær sjálfar.

„Okkur langaði ekki að vera alltaf að blogga um okkur sjálfar. Við förum í heimsóknir, skoðum herbergi og tökum viðtöl við skapandi fólk og fræðumst um hvað það er að gera. Matarfærslur eru inni á milli og svo förum við í bæinn og tökum myndir af götutískunni,“ segir Margrét Unnur.

Það sem hefur vakið athygli eru myndaþættirnir sem stelpurnar gera frá grunni. „Við reddum fötum, finnum umhverfi, sjáum um förðun, tökum flestar myndirnar og vinnum þær. Það tekur mestan tíma að vinna í kringum myndatökurnar,“ útskýra stelpurnar. Mikil vinna er lögð í hverja einustu færslu hjá þeim, enda eru þær í fullri vinnu við bloggið. Bloggið hefur aðeins verið í gangi í einn og hálfan mánuð en þrátt fyrir það fá þær fjölmargar heimsóknir á síðuna.

Stelpurnar leita sér að innblæstri í umhverfinu. „Fólkið í kringum okkur veitir okkur mikinn innblástur. Netið gefur okkur auðvitað líka hugmyndir og þar finnum við jafnvel spennandi fólk sem okkur langar til þess að taka viðtöl við,“ segir Marta.

Þær vinkonur kynntust í Menntaskólanum við Hamrahlíð og sóttu um starfið saman. Í haust mun þó Anna Maggý flytja til London og vera í fjarnámi við Fjölbraut í Breiðholti. Stelpurnar eru að gera ótrúlega góða hluti þrátt fyrir að vera aðeins á átjánda aldursári.

„Þetta er klárlega skemmtilegasta vinna sem við höfum unnið við. Það er alveg frábært að vinna hjá skapandi sumarstörfum og gera það sem við elskum,“ segir Anna.