Hættumat vantar en viðbragðsáætlun klár

Ný viðbragðsáætlun vegna jarðskjálfta í Þingeyjarsýslum lá fyrir í mars. Hættumat hefur ekki verið unnið en vinna sérfræðingahóps nýtist til þess að ljúka þeirri vinnu. Bæjarstjóri Norðurþings segir nýja vitneskju um jarðskjálftasvæðið við Húsavík ekki breyta fyrirætlunum um iðnaðaruppbyggingu á Bakka.

„Það má segja að öll þessi vinna í kringum þessa ráðstefnu, með því að leiða saman alla þessa sérfræðinga, sé grunnurinn að því að vinna frekara hættumat fyrir svæðið. Sérstaklega á það við þegar menn eru að taka í notkun nýtt land; þá fara þeir yfir hlutina og athuga hvaða hættur eru á viðkomandi svæði,“ segir Víðir Reynisson hjá Almannavarnadeild Ríkislögreglustjóra.

Víðir segir ýmis verkefni standa yfir við frekari upplýsingaöflun varðandi jarðskjálfta. „Þetta er alltaf spurning um hvers hættumat á að leiða til. Nú þekkjum við ágætlega hættuna fyrir norðan af fyrri reynslu. Það sem við vitum um hættuna á þessu svæði gerði okkur kleift að vinna góða viðbragðsáætlun,“ segir Víðir.

Fréttablaðið greindi frá því í gær að jarðskorpumælingar sýndu að spenna í Húsavíkurmisgenginu væri til staðar fyrir skjálfta af stærðinni 6,8. Endurskoða þarf staðsetningu kísilmálmverksmiðju við Húsavík og jafnvel færa sjúkrahúsið á staðnum að mati Páls Einarssonar, prófessors í jarðeðlisfræði við Háskóla Íslands.

Bergur Elías Ágústsson, bæjarstjóri í Norðurþingi, segir fréttirnar af hættu á stórum jarðskjálfta nálægt Húsavík og iðnaðarsvæðinu á Bakka ekki ný tíðindi. „Þetta hafa menn verið meðvitaðir um alllengi,“ sagði Bergur Elías í viðtali við fréttastofu Bylgjunnar í gær.

Þá bætti hann við að varðandi iðnaðarsvæðið á Bakka hefðu farið fram ítarlegar rannsóknir og því hefðu þessar upplýsingar engin áhrif á iðnaðaruppbyggingu. Um hættuna af stórum jarðskjálfta sagði Bergur að þetta væri nokkuð sem fólk byggi við og taka yrði því sem að höndum bæri þegar, og ef, að því kæmi.