Fátt um svör varðandi lögheimilisflutninging Dorritar

Fátt er um svör hjá hinu opinbera um það hvernig lögheimilisflutning Dorritar Moussaieff forsetafrúaar bar að, á hvaða forsendum hann var samþykktur og hvaða áhrif og afleiðingar hann hefur.

Fréttablaðið greindi frá því um helgina að Dorrit hefði flutt lögheimili sitt til Bretlands í fyrra þrátt fyrir að íslensk lög segi að hjón skuli hafa sama lögheimili.

Dorrit sendi frá sér yfirlýsingu vegna fréttarinnar á laugardag:

„Þegar horfur voru á að eiginmaður minn yrði ekki lengur forseti gerði ég ráðstafanir til að geta sinnt meira fyrri störfum mínum í London, einkum í ljósi þess að foreldrar mínir, sem stjórnað hafa fjölskyldufyrirtækinu, eru nú háaldraðir,“ segir í yfirlýsingunni, auk þess sem tekið er fram að breytingin hafi verið gerð að ráði lögfræðinga.

Lögfræðilegur ráðgjafi forsetahjónanna í þessum efnum er Garðar Valdimarsson, fyrrverandi skattstjóri og skattrannsóknarstjóri.

Í viðtali við fréttastofu RÚV á laugardag sagði Dorrit að flutningurinn tengdist ekki skattamálum. Ákvörðunin hefði verið tekin vegna þess að bresk lög gerðu ráð fyrir því að hver sem dveldi þar 90 daga á ári eða meira væri búsettur þar að lögum. Hún hefði því þurft að flytja lögheimilið út til að geta starfað að rekstri skartgripakeðju fjölskyldunnar.

Forsetahjónin aftóku með öllu að þau væru að slíta samvistir eða hún að yfirgefa landið fyrir fullt og allt.

Þegar Fréttablaðið leitaði frekari upplýsinga hjá forsetaembættinu í gær fengust þau svör að forsetafrúin hefði engu að bæta við það sem komið hefði fram í viðtalinu við RÚV.

Töluvert hefur verið um það eftir bankahrun að íslensk hjón slíti tímabundið samvistir að forminu til svo að annað þeirra geti flutt lögheimili sitt til útlanda og stundað þar vinnu, til dæmis í Noregi. Fyrir þessu er margra ára hefð og Þjóðskrá Íslands hefur ekki séð ástæðu til að gera athugasemdir við þetta fyrirkomulag.

Þetta segir Sólveig Guðmundsdóttir, forstöðumaður hjá Þjóðskrá. Spurð hvort eitthvað sambærilegt hafi verið uppi á teningnum í tilfelli Dorritar og Ólafs segist Sólveig ekki geta tjáð sig um einstök mál.

Hún geti ekki heldur sagt til um það hvort málefni forsetahjónanna verði tekin til athugunar að nýju hjá Þjóðskrá í kjölfar umræðu helgarinnar, en tekur fram að lögheimilismál einstaklinga séu iðulega endurskoðuð hjá stofnuninni ef eitthvað nýtt komi fram sem þyki kalla á það.

Skattayfirvöld fámál

Spurður um mál Dorritar kveðst Skúli Eggert Þórðarson ríkisskattstjóri ekki geta tjáð sig um málefni einstakra framteljenda.

Bryndís Kristjánsdóttir skattrannsóknarstjóri segir mál forsetafrúarinnar ekki hafa ratað inn á hennar borð. Hún viti ekkert meira um það en fram hafi komið í fjölmiðlum.