Áfram verði byggt á því sem unnist hefur

Gunnar Bragi Sveinsson utanríkisráðherra kynnti fulltrúum framkvæmdastjórnar Evrópusambandsins í gær formlega að hlé hefði verið gert á aðildarviðræðum Íslands við sambandið. Aðilar urðu sammála um að halda áfram samvinnu á mörgum sviðum og fulltrúar ESB lögðu áherslu á að byggt yrði áfram á því sem unnist hefði síðustu ár.

„Persónulega var þetta ekki auðvelt fyrir mig,“ sagði Stefan Füle, stækkunarstjóri ESB, við fjölmiðlamenn, aðspurður um sína skoðun á ákvörðuninni.

„En ég er líka fagmaður og virði án nokkurra spurninga og vafa vilja kjörinna fulltrúa og kjósenda.“

Lagði Füle einnig áherslu á að samskipti Íslands og ESB yrðu enn efld á komandi árum, og byggt á þeim árangri sem þegar hefði náðst.

„Ég útskýrði fyrir honum að þetta væri fyrst og fremst pólitísk ákvörðun sem byggði á stefnuskrám og yfirlýsingum stjórnarflokkanna,“ sagði Gunnar Bragi í samtali við fréttastofu. „Þeir sögðust mundu virða það og vilja vinna með okkur að þeim málum sem við getum nálgast saman.“

Með þessu er öll vinna stöðvuð við aðildarferlið, en samningaviðræður höfðu hafist um 27 samningskafla af 33 og var lokið í ellefu þeirra. Ekki verður heldur gengið frá samningsafstöðu Íslands í þeim fjórum samningsköflum sem eftir eru.

„Það segir sig sjálft að þegar við gerum hlé þá er öll slík vinna lögð til hliðar. Það eru ákveðin vonbrigði fyrir þá en þeir virða og skilja að þetta sé lýðræðisleg ákvörðun.“

Fagnaði loftrýmisgæslu NATO-ríkja

Fyrr í dag hitti utanríkisráðherra Anders Fogh Rasmussen, framkvæmdastjóra NATO. Þeir ræddu meðal annars um stefnu og áherslur ríkisstjórnarinnar í utanríkis- og varnarmálum. Lagði ráðherra áherslu á að aðildin að NATO sé meginstoð í vörnum Íslands og fagnaði vilja bandalagsríkja til þátttöku í loftrýmisgæslu Íslands.

Í ferðinni hitti ráðherra einnig utanríkisráðherra Litháens, sem tekur við formennsku í ráðherraráði ESB um næstu mánaðamót.

Þá kynnti utanríkisráðherra sér einnig starfsemi EFTA og átti fund með Kristni F. Árnasyni framkvæmdastjóra. Þeir ræddu meðal annars helstu áskoranir á vettvangi EES-samningsins.