Hundruð milljóna þarf til að bæta tap

Vegna minni afkastagetu þarf Orkuveita Reykjavíkur að kaupa orku frá Landsvirkjun. Fyrsta árið kostar það 163 milljónir. Stjórnarformaður segir að staðið verði við gerða samninga við Norðurál og hagsmunir almennings varðir.

Hugsanlegt tekjutap Orkuveitu Reykjavíkur vegna sex megavatta minni afkastagetu Hellisheiðarvirkjunar er tæplega fjórtán milljónir króna á mánuði ef ekki er gripið til aðgerða. Það eru tæplega 163 milljónir á ársgrundvelli en sú upphæð tvöfaldast á hverju ári án aðgerða. Þetta kemur til vegna nauðsynlegra kaupa Orkuveitunnar á orku frá Landsvirkjun til að vega upp framleiðslutapið.

Eins og Fréttablaðið greindi frá í gær þá telja vísindamenn Orkuveitunnar að afköst Hellisheiðarvirkjunar muni falla um sem jafngildir sex megavöttum á ári að meðaltali. Því til viðbótar gæti frekari samdráttur komið til vegna vandkvæða við niðurdælingu á vatni.

Samkvæmt útreikningum Fréttablaðsins eru verðmæti sex megavatta á ári, miðað við raforkuverð Landsvirkjunar, tæplega 14 milljónir á mánuði. Því þarf Orkuveitan að kaupa af Landsvirkjun viðbótarrafmagn fyrir 163 milljónir í eitt ár. Sú upphæð tvöfaldast á hverju ári, án aðgerða. Hugmynd Orkuveitunnar er hins vegar að leggja gufulögn frá Hverahlíð til að halda uppi afköstum, en sú framkvæmd er ýmsu háð. Hún gæti þó verið komin í gagnið haustið 2014 ef stjórn ákveður að fara þá leið, og tafir verða ekki vegna nýs umhverfismats svo dæmi sé tekið.

Haraldur Flosi Tryggvason, stjórnarformaður Orkuveitunnar, segir rekstur og orkuöflun fyrir jarðgufuvirkjanir vera flókið langtímaverkefni. Nú liggi fyrir neikvæðar vísbendingar um vinnslugetu þess svæðis sem ætlað var að stæði undir Hellisheiðarvirkjun. Það kalli á að leitað verði lausna sem miða að frekari orkuöflun. Til bráðabirgða virðist það góð lausn að leggja gufulögn frá Hverahlíð að Hellisheiðarvirkjun og fá þannig samtímis vinnslusögu til að meta hvort mögulegt er að virkja þar frekar. 

„Rekstur jarðgufuvirkjunar er ofurseldur áhættu af þessum toga, auðlindin er jú neðanjarðar og háð duttlungum náttúrunnar. Það á eftir að koma í ljós hvort sú staða sem uppi er núna hafi varanleg áhrif á tekjumyndun virkjunarinnar. Alla kosti verður að skoða af yfirvegun í þessu sambandi, þetta er úrvinnslumál.“ Um kaup á raforku frá Landsvirkjun segir Haraldur Flosi að hagstæðir samningar séu í gildi á milli fyrirtækjanna. Þeir samningar eru í gildi næstu árin. 

Spurður um skuldbindingar Orkuveitunnar vegna Hellisheiðarvirkjunar segir Haraldur Flosi að „enn sem komið er sé ekkert uppi á borðinu sem kippi stoðunum undan rekstri þessara virkjana“ og nefnir í því samhengi orkuríkt svæði við Gráuhnúka sem nú er nýtt til niðurdælingar á vatni úr virkjuninni.

„En gagnvart Norðuráli vil ég segja að við ætlum okkur að standa við gerða samninga. Gagnvart almenningi vil ég ítreka að unnið verður að umhverfislegum og fjárhagslegum hagsmunum eins og mögulega er hægt.“