136 banaslys í ferðamennsku á áratug

Á fyrsta áratug aldarinnar, eða frá 2000 til 2010, létust 136 Íslendingar og útlendingar á ferðum sínum um landið. Af þeim létust 56 prósent í umferðarslysum.

„Banaslysum í umferðinni hefur fækkað á undanförnum þremur árum en alvarlegum slysum í umferðinni hefur hins vegar fjölgað. Allir sem koma að ferðaþjónustu þurfa að taka höndum saman til að fækka slysum. Grunnstoðirnar í samfélaginu hafa ekki náð að halda í við aukinn fjölda ferðamanna,“ segir Jónas Guðmundsson, verkefnastjóri hjá Slysavarnafélaginu Landsbjörgu.

Undanfarnar vikur hefur félagið uppfært og greint banaslys tengd ferðamennsku síðastliðinn áratug með gögnum frá Slysaskráningu Íslands, Rannsóknarnefnd umferðarslysa og Hagstofunnar auk gagna Landsbjargar sjálfrar.

Við söfnun gagnanna var miðað við að ferðalag hafi staðið eða átt að standa í að minnsta kosti sólarhring en einnig var miðað við að viðkomandi hefði stundað einhvers konar afþreyingu í dagsferð, að því er Jónas greinir frá.

„Það má segja að tölurnar séu ansi áreiðanlegar. Ráðist var í þessa vinnu til þess að geta metið betur hvert beina eigi forvörnum og til að meta árangur forvarna.“ 

Að sögn Jónasar gera núverandi lög og reglugerðir um ferðaþjónustu litlar sem engar kröfur um öryggismál þótt Ferðamálastofa sé nýbúin að gefa út leiðbeinandi reglur.

„Gera þarf meiri kröfur, en stundum getur eitt einfalt öryggisatriði breytt miklu. Við Seljalandsfoss verður til dæmis fjöldi slysa þegar ferðamenn mætast á stígnum umhverfis fossinn sem er moldardrulla og grjót. Ef ákveðið væri að allir gengju réttsælis þyrfti fólk ekki að víkja og stíga til hliðar," segir Jónas.

"Slíkt gæti komið í veg fyrir slys. Það er margt sem hægt er að gera til að draga úr líkum á slysum en fáir horfa á þá þætti. Við erum langt á eftir miðað við þann fjölda ferðamanna sem hingað kemur. Fjallabak er vinsæl leið og þangað koma líklega 150 til 200 þúsund manns á sumri.

Það er hins vegar ekki hægt að finna staðbundna veðurspá fyrir svæðið. Menn verða að draga ályktanir frá veðurstöðvum lengra í burtu,“ segir Jónas Guðmundsson.