Scooter, Snap! og Vengaboys til Íslands

„Þetta verður stærsta „næntís“-partí Íslandssögunnar,“ segir plötusnúðurinn Kiddi Bigfoot. Þýsku hljómsveitirnar Scooter og Snap!, ásamt hinni hollensku Vengaboys, spila á mikilli tónlistarhátíð í Laugardalshöll 9. nóvember þar sem tónlist tíunda áratugarins verður í hávegum höfð.

„Þetta er „konsept“ sem hefur verið í gangi í Noregi sem heitir We Love the 90"s. Þar er verið að taka stóra listamenn frá þessum áratug og skella þeim saman í eina stóra risaveislu. Það er alveg tilvalið að gera eitthvað slíkt hérna heima líka,“ segir Kiddi, sem er talsmaður hátíðarinnar hérlendis. Hann er mjög spenntur fyrir hljómsveitunum sem stíga á svið. „Þetta eru sjúk nöfn. Scooter hefur komið hingað áður [2004] og hann einn fyllti Höllina. Núna eru Snap! og Vengaboys líka. Ég hef séð Scooter og Snap! á tónleikum og þau leggja sig öll fram við að ná upp stemningu í hæsta gæðaflokki.“

Aðspurður segir hann markaðinn tvímælalaust vera fyrir hendi fyrir svona tónleika hér á landi og er sannfærður um að Laugardalshöll verði stútfull.

„Ég er að vinna sem plötusnúður allar helgar og ég finn fyrir því að það er markaður fyrir þetta.“

Á We Love The 90's-hátíðinni í Noregi í apríl síðastliðnum komu fram Salt N' Pepa, Snap! og Jenny úr hljómsveitinni Ace Of Base. Alls komu tuttugu flytjendur fram á hátíðinni. Hún var haldin í Telenor Arena í Ósló, sem tekur um 23 þúsund manns.

Teknóhljómsveitin Scooter hefur selt yfir 25 milljónir platna um heim allan. Í heimalandinu Þýskalandi hefur hún náð 23 lögum á topp tíu listann, sem er met þar í landi. Hér fyrir neðan má sjá myndband við lagið J'adore Hardcore, sem kom út árið 2009.

Snap! var stofnuð árið 1989 af upptökustjórunum Michael Münzing og Luca Anzilotti. Margir hafa komið við sögu í hljómsveitinni en rapparinn Turbo B er þekktastur, enda söng hann hin vinsælu lög The Power og Rhytm Is A Dancer.

Vengaboys er hugarfóstur Hollendinganna Wesslen van Diepen og Dennis van den Driesschen. Sveitin er þekktust fyrir lögin Boom, Boom, Boom, Boom!!, sem er hægt að sjá í spilaranum hér fyrir ofan, We‘re Going to Ibiza og We Like to Party.