Gatsby snýr aftur

The Great Gatsby segir frá Nick Carraway, fyrrverandi hermanni sem búsettur er á Long Island. Þegar hann kynnist efnuðum og dularfullum nágranna sínum, Jay Gatsby, flækist hann inn í heim þar sem ekkert er sem sýnist. Sagan gerist í skáldaða bænum West Egg á Long Island sumarið 1922.

Nick Carraway flytur í bæinn að stríði loknu og umgengst frænku sína, Daisy Buchanan, og eiginmann hennar Tom. Í gegnum þau kynnist hann Jordan Baker, efnilegum golfara, og hefja þau ástarsamband. Vinirnir sækja veislur sem hinn dularfulli nágranni Carraways, Jay Gatsby, heldur á heimili sínu. Fáir vita nokkur deili á veisluhaldaranum en í gegnum Baker kemst Carraway að því að Gatsby og Daisy voru eitt sinn ástfangin og með veislunum vill Gatsby reyna að vinna aftur ástir Daisy. Leonardo DiCaprio fer með hlutverk hins dularfulla Jays Gatsby, Tobey Maguire leikur Nick Carraway og Carey Mulligan fer með hlutverk Daisy Buchanan. Með önnur hlutverk fara Joel Edgerton, Elizabeth Debicki og Isla Fisher sem fer með hlutverk Myrtle Wilson, ástkonu Toms Buchanan.

Leikstjóri myndarinnar er hinn ástralski Mark Anthony „Baz“ Luhrmann, en hann er leikstjóri mynda á borð við Romeo + Juliet, Moulin Rouge og Australia. Kvikmyndin Romeo + Juliet frá árinu 1996 skartaði Leonardo DiCaprio og Claire Danes í aðalhlutverkum og vann BAFTA-verðlaunin það ár í flokknum besta leikstjórn, en stórmyndin Titanic var tilnefnd í sama flokki. The Great Gatsby fær 7,5 í einkunn á vefsíðunni Imdb.com og 50 prósent frá kvikmyndarýnum á Rottentomatoes.com. Áhorfendur eru þó töluvert jákvæðari í garð myndarinnar og gefa henni 84 prósent á Rottentomatoes.com.-