Viðsnúningur í gengisþróun á fyrsta fjórðungi: Krónan hefur styrkst á árinu

Gengi krónunnar styrktist um 6,6 prósent frá áramótum til marsloka í ár. Fram kemur hjá Greiningu Íslandsbanka að þessi þróun skeri sig úr þegar horft er til sama tímabils síðustu ár.

Bent er á að í fyrra hafi krónan veikst um 5,7 prósent á sama tímabili og árið 2011 hafi veikingin numið 3,6 prósentum. „Krónan er nú á svipuðum slóðum og um miðjan september síðastliðinn og er því gengisveikingin sem varð á síðasta fjórðungi ársins 2012 að fullu gengin til baka,“ segir í umfjöllun Greiningar. „Skýringar á ólíkri þróun krónu nú miðað við síðustu ár liggja að mati okkar í aðgerðum Seðlabankans, betra jafnvægi á þjónustuviðskiptum yfir vetrartímann og líklega einnig í tilfærslu árstíðarsveiflunnar sem einkennt hefur krónuna síðustu árin.“