„Ég er enginn boxari“

Leikarinn Ásgeir Þórðarson, betur þekktur sem Damon Younger, segist óvanur því að standa í handalögmálum og hann efist þess vegna um að hann hafi getað greitt manni sem kærði hann fyrir líkamsárás svo þungt högg að það hafi valdið heilaskaða.

Þetta kom fram við aðalmeðferð líkamsárásarmálsins á hendur honum í Héraðsdómi Reykjavíkur í gær þar sem Ásgeir neitaði sök.

Salur 201 í dómshúsinu var þéttsetinn og rúmlega það, og þurftu nokkrir áhorfenda að standa á meðan á réttarhöldunum stóð. Í salnum var stór hópur blaðamennskunema frá Háskóla Íslands, auk eiginkonu Ásgeirs og vinafólks þolandans.

Sá sem fyrir árásinni varð, 36 ára Reykvíkingur, hlaut „heilahristing, staðbundinn heilaáverka, rifbrot, mar á augnloki og augnsvæði vinstra megin, sár á innanverðri vör og eymsli í vinstri síðu“, að því er segir í ákærunni.

„Ég er enginn boxari,“ sagði Ásgeir, þegar dómari lýsti fyrir honum afleiðingum árásarinnar. Ásgeir sagðist efast um að eitt högg af hans hendi gæti valdið afleiðingum sem þessum. Þolandinn hafi hins vegar fallið í jörðina og gæti hafa hlotið höfuðhögg af því.

Ásgeiri og hinum manninum laust fyrst saman snemma kvölds 17. ágúst 2011 á reyksvæðinu á Kaffibarnum. Allir voru sammála um að þolandinn og vinir hans hefðu verið með almenn leiðindi við Ásgeir og kunningjakonu hans, sem hafi orðið til þess að þeir fóru að ýta í kvið hvor annars.

„Ég var með „six-pack“ á þessum tíma eftir mikið æfingaskeið,“ sagði Ásgeir, sem var þá að búa sig undir hlutverk sitt sem hrottinn Brúnó í kvikmyndinni Svartur á leik. Hann hafi því ekki fundið mikið fyrir því að fá hönd kærandans í magann. Maðurinn sló Ásgeir því næst í andlitið og í kjölfarið yfirgáfu Ásgeir og vinur hans barinn.

Þeir sneru aftur síðar um kvöldið og vildi Ásgeir þá fá að ræða málin við manninn sem hafði ráðist á hann. „Ég spurði hann hvort hann ætti ekki inni hjá mér högg – eins kjánaleg spurning og það er,“ sagði Ásgeir, sem ber þó að hann hafi aðeins slegið til hans í vörn.

Ásgeir segir málið hafa haft miklar afleiðingar fyrir hann. „Ég hef þurft að sæta andúð í samfélaginu,“ sagði hann og bætti við að kjaftasögur gengju um að hann hefði beitt hjólabretti við atlöguna.

Aðalmeðferðinni verður fram haldið síðar.