Ekki nýjar virkjanir hjá OR fyrr en mengunarmál leysast

Orkuveita Reykjavíkur (OR) mun ekki reisa fleiri virkjanir á Hengilssvæðinu fyrr en fundist hefur lausn á brennisteinsvetnismengun. Fyrirtækið hefur óskað eftir frestun á gildistöku reglugerðar um hert skilyrði vegna útblásturs brennisteinsvetnis. Þau eiga að taka gildi 1. júlí á næsta ári.

Samkvæmt núgildandi reglugerð má styrkur brennisteinsvetnis í andrúmslofti fara fimm sinnum á ári yfir viðmiðunarmörk, en aldrei þegar breytingin hefur tekið gildi. OR getur ekki tryggt það nema með mengunarvarnarbúnaði.

„Ef við getum leyst það vandamál á Hellisheiðinni svo óyggjandi sé, þá er okkur óhætt að byggja meira. Það er aðeins ein virkjun í skoðun hjá okkur eins og er, það er Hverahlíðarvirkjun. Hún er áformuð 90 megavött og við byggjum hana ekki fyrr en við erum komin með einhverja lausn á þessu,“ segir Bjarni Bjarnason, forstjóri OR.

Hverahlíðarvirkjun er ein þeirra virkjana sem eiga að sjá álveri Norðuráls í Helguvík fyrir orku.

Fyrirtækið hefur staðið fyrir tilraunaverkefni sem gengur út á það að dæla brennisteinsvetninu og koltvísýringi aftur ofan í borholurnar með affallsvatni. Það hefur gefið góða raun og hafa Landsvirkjun og HS Orka gerst aðilar að verkefninu. Með vísan í tilraunina hafa fyrirtækin farið fram á frestun gildistöku reglugerðarinnar til 2020. Sú beiðni er nú á borði umhverfisráðherra en Umhverfisstofnun hefur gefið jákvæða umsögn gagnvart henni.

Aldís Hafsteinsdóttir, bæjarstjóri í Hveragerði, segir Hvergerðinga hafa lagst gegn öllum undanþágum frá þeirri reglugerð sem ráðuneytið setti, en hún er frá árinu 2010. Hún segir að undanþágubeiðnin nú sé til ansi langs tíma.

„Mér fyndist eðlilegt að þetta væri fyrst kynnt fyrir okkur áður en undanþága verður gefin. Íbúar verða að hafa sitt að segja.“