Var sagt að fara heim og bíða rólegur

Sigurður Valdimar Steinþórsson, íbúi á Húsavík, hefur glímt við alvarlegt þunglyndi í tvö ár. Hann gagnrýnir geðheilbrigðiskerfið á Norðurlandi harðlega og segir ekkert gert fyrir fólk í vanda.

„Það er alveg sama hvert vandamálið er, þótt þú sért með skýrslu um það að þú sért geðveikur og eigir að vera læstur inni, þá er ekki hlustað á þig,“ segir hann.

Sigurður hefur nú beðið eftir viðtali við yfirlækni geðdeildarinnar í þrjá og hálfan mánuð til að fá ný lyf og samtal.

„Ég hef einu sinni komið þangað og þá var lítið gert annað en að segja mér að fara heim og láta mér líða betur. Ég sagði lækninum að ég væri með ítrekaðar sjálfsvígshugsanir og vildi ný lyf, en hann sagði mér að bíða rólegur og vona það besta. Hann bauð mér samtal við félagsráðgjafa daginn eftir, sem ég afþakkaði.“