Fleiri vilja að ríkið greiði listamannalaun

Rúmur helmingur landsmanna er andvígur því að ríkið greiði listamannalaun samkvæmt niðurstöðu skoðanakönnunar MMR, en fækkað hefur í þeim hópi á síðustu árum.

Alls eru 54,5 prósent andvíg því að ríkið greiði listamannalaun, en 45,5 prósent eru því fylgjandi, samkvæmt könnun sem MMR gerði í febrúar síðastliðnum.

Nokkur breyting hefur orðið á afstöðu landsmanna frá því í mars 2010 þegar 61,4 prósent sögðust andvíg greiðslu listamannalauna en 38,6 prósent voru hlynnt þeim.

Mikill munur er á afstöðu fólks eftir stuðningi við stjórnmálaflokka. Meirihluti stuðningsmanna Sjálfstæðisflokks og Framsóknarflokks er andvígur greiðslunum en meirihluti þeirra sem styðja hina flokkana er hlynntur.

Könnun MMR var gerð dagana 19. til 21. febrúar, þátttakendur voru 814 á aldrinum 18 til 67 ára, valdir úr hópi álitsgjafa MMR. Alls tóku 88,2 prósent afstöðu.