Eitur í hrísgrjónum veldur áhyggjum

Matvælastofnun skoðar nú hvort nauðsynlegt sé að setja reglur um aldurstakmark á neyslu á hrísgrjónamjólk hér á landi þar sem of mikið magn af arseni, sem er eitraður málmungur og getur valdið krabbameini, hefur fundist í hrísgrjónadrykkjum.

Ný sænsk rannsókn leiddi í ljós að hrísgrjónaplöntur taka í sig arsen á vaxtartímanum og ná svo ekki að losa það úr fyrir uppskeru. Af þessum sökum hafa verið settar reglugerðir á Norðurlöndunum og Bretlandi þar sem aldurstakmark er sett á neyslu hrísgrjónamjólkur, allt frá þriggja til sex ára.

Zulema Sullca Porta, sérfræðingur hjá Matvælastofnun (MAST), segir ástæðu til að skoða þessar reglugerðir hér á landi. Hún býst við því að MAST gefi út viðmiðunarreglur í næstu viku þegar norrænni ráðstefnu sérfræðinga um málið er lokið.

„Hrísgrjónin virðast vera vandamálið, sérstaklega þar sem vörurnar eru markaðssettar fyrir börn. Vandamálið með hrísgrjónamjólkina er sú að lítill einstaklingur innbyrðir mögulega mjög mikið magn á hverjum degi og því getur það talist skaðlegra en aðrar vörur," segir hún og tekur þar hrískökur og grauta sem dæmi. „Ungabörn geta drukkið allt að hálfan lítra á dag og þess vegna hringja þessar viðvörunarbjöllur. Þetta er ekki æskilegt fyrir svona ung börn þegar mjólk er þeirra aðalfæða."

Zulema beinir til foreldra barna með mjólkuróþol að skoða aðra kosti en hrísgrjónamjólk á meðan rannsóknirnar standa yfir. „Fyrstu niðurstöður benda til þess að við þurfum að hafa áhyggjur af þessu," segir hún.