Kosningaréttar kvenna minnst

Ásta Ragnheiður Jóhannesdóttir, forseti Alþingis, hefur lagt fram þingsályktunartillögu um hvernig eigi að minnast þess að árið 2015 verður öld liðin síðan konur fengu kosningarétt á Íslandi.

Í greinargerð segir að mikilvægt sé að minnast þessara tímamóta og um leið „blása til nýrrar sóknar í jafnréttismálum".

Tillagan felur í sér að boðað verði til undirbúningsfundar þar sem kosin verður framkvæmdanefnd. Framkvæmdastjóri verði ráðinn og tillögur verði gerðar um fjárframlög til verkefnisins á árunum 2013 til 2015.