Kynferðisbrotamáli vísað aftur til lögreglu

Lögreglan á Akranesi bíður nú eftir niðurstöðum úr læknisrannsóknum og gögnum um sjúkrasögu rúmlega áttræðs manns af Snæfellsnesi sem grunaður er um að hafa brotið kynferðislega gegn stjúpdóttur sinni í áratugi.

Rannsókn málsins er að öðru leyti lokið, að sögn Jónasar H. Ottóssonar lögreglumanns. Það var raunar sent Ríkissaksóknara til ákærumeðferðar fyrir nokkru, en Ríkissaksóknari vísaði því aftur til rannsóknar og óskaði eftir því að áðurnefndra gagna yrði aflað.

Maðurinn sat í gæsluvarðhaldi vikum saman eftir að málið kom upp í vor. Konan, sem er verulega greindarskert eftir heilaskaða sem hún hlaut í æsku, fékk þá nálgunarbann á stjúpföðurinn fyrrverandi. Það verður í gildi þar til í næsta mánuði. Hann hefur ekki játað sök.

Konan hefur einnig borið um misnotkun af hálfu tveggja bræðra stjúpföðurins fyrrverandi, en þeir létust báðir um aldamótin. Annar þeirra bjó á sama bæ og fjölskyldan.

Meðal þess sem kannað var við rannsókn málsins var hvort ófeðruð dóttir konunnar væri dóttir stjúpföðurins. DNA-rannsókn leiddi í ljós að svo væri ekki.

Búið að ákæra tengdasoninn

Meint brot stjúpföðurins fyrrverandi uppgötvuðust eftir að í ljós kom í janúar að þáverandi tengdasonur konunnar hafði einnig misnotað hana um nokkurra mánaða skeið. Þegar farið var að ræða við konuna um málið greindi hún einnig frá brotum stjúpföðurins og bræðra hans.

Ríkissaksóknari hefur nú gefið út ákæru á hendur tengdasyninum fyrrverandi. Hann játaði brotin á rannsóknarstigi en hefur ekki tekið afstöðu til ákærunnar fyrir dómi. Ákæran var gefin út í vor. Brotin sem um ræðir eru gróf – hann mun meðal annars hafa haft samræði við greindarskerta tengdamóður sína.