Vilja leggja áherslu á skuldamál heimilanna

Forystusveit Framsóknarflokksins var kjörinn með miklum meirihluta á flokksþingi flokksins í dag. Formaðurinn segist vilja vinna með þeim flokkum sem skilja þeirra sjónarmið í mikilvægum málum.

Flokksþing Framsóknarmanna fer fram um helgina í Gullhömrum í Gafarholti, í dag var gengið til atkvæða um embætti í forystusveit flokksins. Einungis Sigmundur Davíð Gunnlaugsson sitjandi formaður gaf kost á sér í embætti formanns en allir fulltrúar þingsins eru hins vegar kjörgengir, þannig ruglaðist einn fyrrverandi formaður flokksins Guðni Ágústsson og hóf að skrifa sitt eigið nafn á kjörseðilinn af gömlum vana. Hann áttaði sig hins vegar á því og fékk nýjan kjörseðil frá kjörstjórn.

Sigmundur hlaut yfirburða kosningu til formanns með 97,6 prósent atkvæða og segist hann ekki hafa búst við svo afgerandi sigri. Hann segir að þegar að ríkisstjórnarsamstarfi komi þá vilji flokkurinn vinna með öðrum flokkum sem hafa skuldamál heimilanna ofarlega á baugi.

„Það kann að hljóma eins og tilætlunarsemi en kosturinn við að vera miðjuflokkur er sá, að við byggjum stefnu okkar á því sem við teljum rökrétt í hverju máli. Þess vegna vonandi getum við útskýrt fyrir öðrum flokkum hvað er rökrétt að gera og sá sem skilur það best, hann hentar best til að vera í stjórn með okkur," segir Sigmundur Davíð.

Sigurður Ingi Jóhannsson var einn í framboði til varaformanns og fékk hann einnig yfirburða kosningu með yfir 94 prósent atkvæða. Hann segist finna fyrir miklum meðbyr með flokknum.

„Bæði innan flokksins og úti í samfélaginu og hann skilar sér hér inn á fundinn, að menn eru tilbúnir að gera góða hluti bæði fyrir Framsóknarflokkinn og fyrir þjóðina í vor," segir hann.

Þá var Eygló Harðardóttir endurkjörin ritari flokksins með 94 prósenta fylgi. Flokksþinginu lýkur á morgun.