Landspítalinn fær enga innspýtingu - fé til tækjakaupa skorið niður

Landspítalinn fær ekki aukið rekstrarfé frá fyrra ári og eru framlög til spítalans í nýju fjárlagafrumvarpi í raun óbreytt. Frumvarpið gerir ráð fyrir að útgjöld ríkissjóðs vegna rekstrar spítalans nemi 38,5 milljörðum króna.

Tímabundið 600 milljóna króna framlag til spítalans vegna tækjakaupa er fellt niður. Hagræðingarkrafa á spítalann felur í sér hækkun á sértekjum sem verður náð með nýju legugjaldi. Um er að ræða nýtt gjald þar sem sjúklingar greiða 1.200 krónur fyrir hvern sólarhring sem þeir dvelja á Landspítalanum. Með þessu nýja gjaldi er spítalanum reiknaðar um 200 milljónir í sértekjur.

Þeir sem gerst þekkja rekstur Landspítalans benda á að með óbreyttu framlagi til rekstarins og niðurskurður á tækjakaupafé þýði í raun 2,5 til 3,5% niðurskurður til spítalans þegar allt er talið.

Í texta frumvarpsins segir að nú sé unnið að endurmati á þörf Landspítalans fyrir tækjakaup næstu ára og "er þess vænst að þau mál skýrist á haustdögum."

Einnig kemur fram að 15 milljóna króna tímabundið framlag vegna nýbyggingar Grensásdeildar - endurhæfingardeildar Landspítalans - er fellt niður.

Almennar launa- og verðlagsbreytingar nema 1,3 milljarði króna og að þeim meðtöldum verða útgjöld til spítalans tæplega 40 milljarðar króna.

Helstu breytingar á útgjöldum markast af framlagi til stofnanasamninga, sem gerðir voru í kjölfarið á jafnlaunaátaki stjórnvalda, að fjárhæð 881 milljón króna.