Tugir flóttamanna látnir eftir að bátur sökk á Miðjarðarhafi

Að minnsta kosti 78 afrískir flóttamenn fórust þegar eldur kom upp í skipi undan ströndum eyjunnar Lampedusa utan við Sikiley.

Skipið sökk í framhaldinu, en fólkið var á leið til Ítalíu og er talið að allt að 500 manns hafi verið um borð. Staðfest er að 159 hafi verið bjargað, en um 250 er saknað, þannig að tala látinna gæti enn hækkað, en björgunaraðgerðir standa enn yfir.

Hundruð manna hafa látist á leiðinni yfir Miðjarðarhafið frá Afríku síðustu ár. Síðast á mánudag létust 13 flóttamenn við strendur Sikileyjar.

Eyjan Lampedusa er syðsta landsvæði Ítalíu, ekki langt frá ströndum Túnis, og því algengt að bátar með flóttafólk taki kúrsinn þangað.