Ekki hægt að una við ástandið á Vestfjörðum

Ástand raforkumála á Vestfjörðum er með þeim hætti að ekki verður lengur við unað. Þetta segir Úlfar Lúðvíksson, sýslumaður á Ísafirði og á Patreksfirði, í yfirlýsingu til fjölmiðla.

Hann bendir á að stjórn aðgerða í héraði, þegar almannavarnaástand ríki, sé í höndum lögreglustjóra í viðkomandi lögregluumdæmi. Þegar verst var um síðustu áramót hafi verið stutt í það að öll fjarskipti við Vestfirði rofnuðu vegna rafmagnsleysis. Við slíkar aðstæður séu mönnum allar bjargir bannaðar og lífi og heilsu almennings, umhverfi og eignum ógnað.

„Díselrafstöðvar sem sjá eiga íbúum og fyrirtækjum fyrir varaafli biluðu þegar á reyndi. Lögreglustöðin á Ísafirði getur ekki treyst á varaafl frá þessum stöðvum. Ekki slökkvistöðin, ekki símstöðin. Sjúkrahús og Vegagerð búa við eigið varaafl, ekki að ástæðulausu. Ástand raforkumála á Vestfjörðum er slíkt að ekki verður lengur við unað," segir hann.

Úlfar segir að sveitarstjórnir, almenningur og þingheimur hljóti að vera sammála um að ástandið sé ómögulegt. Hann hafi af þessu miklar áhyggjur og telji að stjórnvöld verði þegar í stað að bregðast við. Tryggja þurfi að helstu stofnanir samfélagsins njóti rafmagns og að öruggt varaafl sé til staðar. „Umræðan ein og sér dugir ekki, vandamálið er áratuga gamalt og þekkt. Ekki á að linna látum fyrr en bætt hefur verið úr. Rannsóknarnefnd almannavarna sem starfar sjálfstætt og óháð stjórnvöldum á hiklaust að taka til starfa að loknu þessu hættuástandi og fara yfir málið. Stjórnvöld þurfa að rétta Orkubúi Vestfjarða hf. og Landsneti hf. hjálparhönd. Látum verkin tala," segir hann.