Enginn matarskortur í mestu matarkistu landsins

Páll Björgvin Guðmundsson, bæjarstjóri í Fjarðabyggð, segir að opnað verði fyrir umferð um Oddskarð í dag. Íbúar á Neskaupstað hafa verið innlyksa vegna snjókomu og hvassviðris síðan á sunnudag.

„Það er búið að opna fyrir umferð en það er talið að það verði þokkalega fólksbílafært um hádegið. Þetta er allt að réttast af," segir Páll Björgvin sem segir þó hafa verið opnað fyrir umferð í neyðartilfellum síðan á sunnudag.

„Það er mjög öflug björgunarsveit, mokstursaðilar og vegagerð sem vinna í miklu samstarfi við sjúkrahúsið að leysa úr þessum málum," segir Páll Björgvin.

Páll Björgvin segir Austfirðinga ýmsu vanir þótt veður hafi verið með mildara móti síðustu ár samanborið við fyrri tíð.

„Í seinni tíð hefur veðrið verið mjög hagstætt. Eftir að álverið kom hefur þjónusta í mokstri og slíku verið mjög góð. Við höfum ekki orðið vör við þetta undanfarin ár. Þessi hvellur var nokkuð öflugur núna. Það verður að segjast eins og er," segir Páll Björgvin sem segir að dagvörum hafi fækkað í hillum verslana. Því fari þó fjarri að um matarskort hafi verið að ræða.

„Það er farið að minnka í hillunum, dagvöru og svoleiðis en það er enginn matarskortur í þessari mestu matarkistu landsins," segir Páll Björgvin og hlær. Hann segir þó lokunina undanfarna daga sýna fram á mikilvægi nýrra gangna fyrir íbúa á svæðinu.

„Þetta undirstrikar mikilvægi nýrra Norðfjarðargangna sem eru að fara í loftið á næstunni. Forvali þar er lokið og verður vonandi boðið út á vordögum. Við erum að sjá framkvæmdir þá hefjast í haust," segir Páll Björgvin.