Hart tekist á um stjórnarskrárfrumvarpið í dag

Lokaátökin um stjórnarskrárfrumvarpið hófust á Alþingi í dag við upphaf annarrar umræðu um málið. Þingmenn Sjálfstæðisflokks og Framsóknarflokks tala ýmist um bútasaum eða verið sé að hafa alþingismenn að fíflum. Formaður stjórnlaganefndar sagði tíma kominn til að stjórnarandstaðan hætti að stoppa öll þjóðþrifamál.

Það er óhætt að segja að önnur umræða um stjórnarskrárfrumvarpið umdeilda hafi byrjað á kunnuglegum nótum í dag. Á meðan stjórnarliðar og þingmenn Hreyfingarinnar töluðu í austur töluðu Sjálfstæðismenn og Framsóknarmenn í vestur. Gert var að deiluefni að önnur umræða væri að hefjast á sama tíma og boðað væri til fundar í stjórnlaganefnd í fyrramálið.

„Er verið að viðurkenna það sem reyndar blasir við öllum að þetta mál er hvorki hrátt né soðið? Það er algerlega óundirbúið. Er þetta viðurkenning að hálfu forystu nefndarinnar að þetta mál hafi ekki verið tilbúið til þessarar umræðu? Er hugmyndin að leggja þetta mál hér fram í einhverjum bútum og bitum sem við ræðum síðan á þeim grundvelli? Ber að líta þannig á að nefndarálitið sé fullbúið plagg eða hvers konar skrípaleikur er hér á ferðinni?" sagði Einar K. Guðfinnsson þingmaður Sjálfstæðisflokksins.

Gunnar Bragi Sveinsson þingflokksformaður Framsóknarflokksins sagði koma sér á óvart að boðað væri til fundar í stjórnlaganefnd þegar heita ætti að málið væri fullklárað frá nefndinni.

„Við hljótum því að spyrja hvort þingmenn hafi verið hafðir einhvern veginn að fíflum með því að setja hér inn nefndarálit og athugasemdir ef það á að fara að breyta málinu sem þeir hafa skilað inn álitum fyrir áður en umræðan er tæmd," sagði Gunnar Bragi.

Formaður stjórnlaganefndar, Valgerður Bjarnadóttir, sagði ákveðna þingmenn hafa óskað eftir skýringum á ákvæðum frumvarpsins um kosningar til Alþingis og henni hafi þótt sjálfsagt að verða við því en var slegin út af laginu með frammíköllum.

Hún náði sér þó fljótt á strik og sagði ábúðarfull:

„Ég ætlaði að hjálpa til við að skýra þetta. Þannig eru nú mál oft unnin, þótt þau séu ekki unnin hér í þessu þingi þar sem sem ekkert kemst áfram og menn stoppa öll þjóðþrifamál."