Útbúa þrengingar á alræmdri slysagötu

Þrengt verður að bílum á Snorrabraut til að hægja á umferð um götuna. Eitt af hverjum tuttugu alvarlegum slysum þar sem ekið er á gangandi vegfarendur verður á Snorrabraut. Fulltrúi í samgönguráði sagði hraðakstur ekki stundaðan.

„Við teljum brýnt að ekki verði lengur dregið að grípa til ráðstafana sem auka öryggi gangandi vegfarenda,“ segir í bókun fulltrúa Samfylkingar, Besta flokksins og VG sem samþykktu í umhverfis- og skipulagsráði að auka öryggi gangandi vegfarenda á Snorrabraut.

„Snorrabraut er ein af hættulegustu götum borgarinnar. Rannsóknir sýna að alvarleg slys og dauðaslys eru hlutfallslega algengari þar en á öðrum götum,“ segir áfram í bókun fyrrgreindra fulltrúa.

Útbúa á þrengingar á Snorrabraut. Páll Hjaltason, Elsa Hrafnhildur Yeoman, Karl Sigurðsson, Hjálmar Sveinsson, Kristín Soffía Jónsdóttir og Torfi Hjartarson sögðu tillögurnar vera frá sérfræðingum á umhverfis- og skipulagssviði. „Þær eru liður í því að gera borgargöturnar öruggari fyrir gangandi vegfarendur án þess að dregið sé úr eðlilegu flæði bílaumferðar.“

Tveir af þremur fulltrúum Sjálfstæðisflokks greiddu einnig atkvæði með tillögunni en áréttuðu að hún fæli aðeins í sér aðgerð til bráðabirgða „til að koma í veg fyrir fleiri alvarleg slys“, eins og segir í bókun Gísla Marteins Baldurssonar og Hildar Sverrisdóttur.

Gísli og Hildur sögðu að fara yrði í löngu boðaðar aðgerðir um heildarhönnun Snorrabrautar sem væri stórhættuleg gangandi vegfarendum. Þar hefðu orðið tvö banaslys á síðustu átta árum.

„Næstum fimm prósent alvarlegra slysa og dauðaslysa þar sem ekið var á gangandi vegfarendur á árunum 1996 til 2011 urðu á Snorrabraut. Því er ekki boðlegt að draga aðgerðir lengur,“ bókuðu Hildur og Gísli.

Þriðji fulltrúi Sjálfstæðisflokksins í ráðinu sat hjá. „Gögn sem lögð hafa verið fram á fundi ráðsins styðja ekki að hraðakstur sé stundaður á Snorrabraut og því eðlilegt að skoða hvort aðrar aðstæður eins og lýsing eða upplýsingaskilti skapi hættu í umferðinni,“ bókaði Júlíus Vífill Ingvarsson, sem lagði til að leitað yrði eftir áliti lögreglustjóra og Slökkviliðs höfuðborgarsvæðisins á þrengingu Snorrabrautar, einkum með tilliti til neyðaraksturs.

„Hraða umferðar má stýra með ýmsum hætti,“ bætti Júlíus við og benti á hraðamyndavélar og upplýsingar til vegfarenda. „Með þeim hætti má halda niðri umferðarhraða án þess að trufla flæði umferðar þannig að ökumenn haldi athygli og fylgist betur með umhverfi sínu.“