Taka ekki undir lýsingar lögreglu um mansalsmál

Engar vísbendingar hafa komið fram í um 100 vændismálum sem lögregla höfuðborgarsvæðisins hefur tekið til skoðunar um að vændiskonur sem hér starfi séu fórnarlömb mansals.

Þetta kemur fram í skýrslu ríkislögreglustjóra um skipulagða glæpastarfsemi og hættu á hryðjuverkum sem kom út í gær.

Í skýrslunni segir að rannsóknir lögreglunnar á höfuðborgarsvæðinu haustið og veturinn 2012 hafi ekki leitt í ljós að mansal færi fram í umdæminu. Sama sé að segja um rannsóknir á vændi í umdæminu.

„Í um 100 málum sem til skoðunar hafa verið hafa ekki komið fram vísbendingar um að vændiskonur sem hér starfa séu fórnarlömb mansals,“ segir í skýrslunni.

Þar er þó tekið fram að grunur leiki á að mansal „kunni að fara fram“ hér á landi, einkum á höfuðborgarsvæðinu og Suðurnesjunum.

Guðrún Jónsdóttir, talskona Stígamóta, segist ekki geta tekið undir lýsingar. „Það er alveg ljóst að það hafa komið upp þó nokkur mál sem talin eru tengjast mansali, þó það hafi reynst erfitt að sanna það,“ segir Guðrún.

Hún bendir á að átta erlendar konur hafi dvalist í Kristínarhúsi í fyrra sem tengja megi við mansal. Fimm konur hafi sjálfar staðfest að þær hafi verið fórnarlöm mansals, og að þær hafi verið sendar hingað í vændi. Þá hafi opinbera aðila grunað að þrjár til viðbótar hafi verið fórnarlömb mansals. 

„Mér hefði þótt eðlilegra að tala um að ekki séu staðfest dæmi um mansal,“ segir Guðrún. „Hjá okkur hafa dvalist konur vegna þess að það hafa verið taldar þó nokkrar líkur á að þær hafi verið fórnarlömb mansals.“

Varasamir aðstoðarmenn hælisleitenda

Flóttamenn sem sækja um hæli hér á landi geta verið útsettir fyrir misneytingu og ógnum af hálfu fólks sem gefur sig út fyrir að aðstoða þá við ýmis mál, segir í skýrslu ríkislögreglustjóra.

Í skýrslunni segir að dæmi séu um slíka varasama aðstoðarmenn hér á landi, gjarnan fólk sem hafi haldið til hér á landi í lengri eða skemmri tíma. Þiggi hælisleitendur aðstoð geti skapast fjárhagsleg skuldbinding. Þekkt sé að erlendis hafi slíkar skuldbindingar gjarnan í för með sér misneytingu ýmiskonar og ógnir gagnvart hælisleitendum, og jafnvel gegn ættingjum þeirra í heimalandinu.