Fjallgöngukona fórst eftir fall í Esjuhlíðum

Kona lést er hún hrapaði í hlíðum Esjunnar í gær. Konan var á ferð við Hátind ásamt um þrjátíu manna gönguhópi er hún féll og rann yfir tvö hundruð metra.

Tilkynning um slysið barst klukkan 14.31 Þá var veður tekið að versna hratt og svo mikið að ekki reyndist unnt að senda þyrlu til aðstoðar konunni sem var efst í Grafardal vestan við Hátind. Afar seinlegt var fyrir um tuttugu þrautþjálfaða björgunarsveitarmenn að komast upp á slysstaðinn enda um ís og kletta að fara. Slæmt fjarskiptasamband var í fjallinu vegna óveðursins. Þegar björgunarmenn náðu til konunnar um klukkan fimm var hún látin.

Hópurinn var á göngu við þekkta gönguleið við Hátind sem er rétt við hæsta tind Esjunnar. Stærsti hluti hópsins hélt niður af fjallinu en þrír göngumenn fóru á slysstaðinn sem er í um 620 metra hæð. Björgunarmenn aðstoðuðu þá við að komast niður af fjallinu og tók það um þrjár klukkustundir. Sá síðasti þeirra kom ekki niður á jafnsléttu fyrr en um klukkan átta í gærkvöld enda þurfti að síga hamra. Komið var með konuna niður upp úr klukkan hálfníu.

?„Svona fjöll á Íslandi á þessum árstíma eru alltaf erfið yfirferðar. Þetta eru því sem næst þverhníptir klettar,"? segir Jónas Guðmundsson hjá Slysavarnafélaginu Landsbjörgu.

Að sögn Jónasar voru björgunarsveitarmenn komnir að Esjurótum um klukkustund eftir að aðstoðar var óskað. Svæðisstjórn björgunarsveitanna stýrði aðgerðum úr flutningabíl með stjórnstöð sinni. Alls tóku um fimmtíu manns þátt í verkefninu.

Ekki er hægt að greina frá nafni hinnar látnu að svo stöddu. Ekki var heldur gefið upp í gærkvöld um hvaða gönguhóp var að ræða.

Auk þess að takast á við þetta erfiða verkefni í Esjunni voru björgunarsveitarmenn sendir til að aðstoða skíðafólk í Skálafelli. Þar skall skyndilega á brjálað veður og færð spilltist hratt.

gar@frettabladid.is