Blóðugur innbrotsþjófur stal engu en skemmdi mikið

Hann var óheppinn innbrotsþjófurinn sem braust inn í Keiluhöllina að Ásbrú í gærmorgun. Þjófurinn komst inn með því að kasta grjóti í gegnum glugga.

Þegar hann skreið svo inn virðist hann hafa skorið sig heldur illa því blóðslóðin lá um allt húsið samkvæmt upplýsingum frá lögreglu.

Þjófurinn braut sér svo leið í gegnum gipsvegg sem skildi á milli Keiluhallarinnar og sjoppu sem er í sama húsnæði.

Blóðslóðin lá að afgreiðsluborði hennar en þá virðist viðvörunarkerfi, sem fór í gang, hafa stuggað við innbrotsþjófnum, því einskis var saknað. Hann fór sömu leið til baka og braut aðra rúðu í keiluhöllinni til að komast út.