Helmingi færri atkvæði en í síðustu baráttu um formannsstólinn

Rúmlega helmingi færri greiddu atkvæði í kosningu um formann Samfylkingarinnar í ár heldur en árið 2005, þegar síðast var keppst um formannsstólinn. Um 5500 flokksfélagar hafa kosið í ár en árið 2005 greiddu um 12 þúsund atkvæði.

Rafrænni kosningu lauk klukkan 18 í gær en atkvæði sem send voru bréfleiðis munu skila sér í þessari viku á skrifstofu flokksins, svo von er á nokkrum atkvæðum í viðbót.

Eysteinn Eyjólfsson, upplýsingafulltrúi Samfylkingarinnar, segir í samtali við fréttastofu að árið 2005 hafi töluvert fleiri verið skráðir í flokkinn. „Í ár er um þriðjungsþátttaka og það er mjög gott miðað við allsherjarkosningu," segir hann.

Þetta er í fyrsta skiptið sem kosið er rafrænt um formann flokksins, en áður hefur verið haldin rafræn allsherjarkosning. Úrslitin verða svo kunngjörð á laugardaginn kl. 11:30 á landsfundi flokksins sem verður haldinn í Vodafone-höllinni að Hlíðarenda. „Það hefur allt gengið rosalega vel og stóð kosningin yfir í 10 daga. Það var markmiðið hjá skrifstofunni að tryggja að þeir sem voru á kjörskrá gætu kosið, og það gekk allt eftir," segir hann.

Guðbjartur Hannesson, velferðarráðherra, og Árni Páll Árnason, þingmaður, voru tveir í framboði til formanns en Jóhanna Sigurðardóttir, forsætisráðherra og núverandi formaður flokksins, gaf það út í haust að hún ætlaði ekki að sækjast eftir endurkjöri þar sem hún ætlaði að hætta í pólitík.

Þær Katrín Júlíusdóttir, fjármála- og efnahagsráðherra og Oddný G. Harðardóttir, fyrrverandi ráðherra, hafa boðið sig fram í varaformanninn. Frestur í stöðuna rennur út klukkan 13 á laugardaginn, og verður svo kosið klukkan 15.

Eysteinn býst við skemmtilegum landsfundi. „Þetta verður spennandi laugardagur, til dæmis verður síðasta setningarræða Jóhönnu klukkan 14 á föstudaginn og svo stefnuræða nýs formanns á sama tíma á sunnudaginn," segir hann.

Nánari upplýsingar um landsfundinn má finna hér.