Jómfrúarferðin klikkaði - þurfti að snúa við til Reykjavíkur

Flugvél Eyjaflugs sem átti að lenda á Sauðárkróki í morgun var snúið við skömmu fyrir lendingu eftir að viðvörunarljós gáfu til kynna að öll dekk vélarinnar væru ekki niðri.

Áður en vélin kom inn til lendingar á Reykjavíkurflugvelli var henni flogið framhjá flugturninum sem tjáði flugstjóranum að öll hjólin væru niðri. Samkvæmt upplýsingum frá Isavia var vélinni lent mjög varlega vegna þess að þó hjólin séu niðri, þýðir það ekki að þau séu læst.

Vélin lenti svo á heilu og höldnu klukkan nítján mínútur í tíu í Reykjavík.

Fjöldi fólks beið á Sauðárkróki eftir komu vélarinnar enda var þetta fyrsta áætlunarferðin til bæjarins í rúmt ár eftir að flugfélagið Ernir hætti flugi á leiðinni, 1. janúar í fyrra.

Ekki er vitað hvort að vélin fljúgi aftur á Sauðárkrók í dag.