Breskir skattgreiðendur tapa 20 milljörðum á dómnum

Breskir skattgreiðendur tapa 20 milljörðum íslenskra króna á dómi EFTA dómstólsins í gær. Þetta er fullyrt í breska blaðinu Daily Telegraph. Ísland vann sem kunnugt er fullnaðarsigur vegna Icesave-málsins.

Í greininni segir að samkvæmt dómnum eigi bresk stjórnvöld ekki möguleika á að krefjast vaxta af láni sem veitt var til að tryggja innistæður á Icesave-reikningunum. Að auki vakni upp spurningar um milliríkjastarfsemi banka innan Evrópusambandsins.

Í grein Telegraph er rifjað upp að málið megi rekja allt til þess að Icesave reikningunum var lokað við hrun Landsbankans árið 2008. Til að forðast áhlaup á aðra banka hafi Alistair Darling, fjármálaráðherra Breta, ákveðið að tryggja innistæður 230 þúsund innistæðueigenda í Bretlandi. Upphæðin hafi numið um 3,5 milljörðum punda.