Íslensku kokkarnir í hópi þeirra bestu

Keppnisdegi matreiðslumannsins Sigurðar Kristins Laufdal Haraldssonar í Bocuse d'Or-matreiðslukeppninni, þeirri virtustu sinnar tegundar í heiminum, lauk um klukkan þrjú í dag að íslenskum tíma.

Keppnin fer fram annað hvert ár í borginni Lyon í Frakklandi, en Íslendingar tóku fyrst þátt árið 1999 og komust á verðlaunapall árið 2001, þegar Hákon Már Örvarsson vann til bronsverðlauna.

Friðgeir Eiríksson, yfirmatreiðslumaður Holtsins, var viðstaddur keppnina í dag og segir íslenska liðið hafa staðið sig með eindæmum vel.

„Hann var einn af þeim bestu í dag, það er augljóst mál," segir Friðgeir og segir Ísland og Svíþjóð átt það flottasta sem fram kom í keppni dagsins.

Dómarar taka mið af bragði jafn sem framsetningu matarins, og þótti kjötréttadiskur íslenska liðsins sérstaklega glæsilegur.

„Þetta snýst auðvitað um bragð, númer eitt, tvö og þrjú, en öll framsetning og hönnun á matnum er einnig tekin með í reikninginn."

Fyrri helmingur keppnisþjóðanna keppti í dag, en úrslit verða tilkynnt upp úr klukkan fimm á morgun að íslenskum tíma, eftir að hinn helmingur keppenda hefur lokið sér af.

Fylgjast má með beinni útsendingu frá keppninni á vefsíðunni Freisting.is