VÍS brýtur ísinn í Kauphöll Íslands

Sigrún Ragna Ólafsdóttir, forstjóri VÍS, verður við skráningu VÍS á markað eftir helgi fyrsti kvenforstjórinn til að stýra skráðu félagi eftir hrun.

„Mér hafði verið bent á að þetta kynni að vera tilfellið, en svo sem ekki leitt hugann mikið að þessu,“ segir Sigrún Ragna. Allur tími hennar hafi farið í að einbeita sér að því að ljúka skráningarferlinu. Taka á bréf VÍS til viðskipta í Nasdaq OMX Kauphöll Íslands þriðjudaginn 24. apríl, síðasta vetrardag.

Um leið segir Sigrún Ragna vitanlega jákvætt að fá konu í hóp þeirra sem stýra skráðum fyrirtækjum hér á landi. „Ég hef líka þá bjargföstu trú að það skipti máli að hafa góða dreifingu í hópum, alveg sama hvort það er hjá forstjórum, í stjórnum eða hjá stjórnendum almennt.“

Upphaflega stóð til að selja 60 prósent hlutafjár í VÍS í útboðinu sem lauk á þriðjudag en það hlutfall var hækkað í 70% í ljósi mikils áhuga. Seld voru bréf í félaginu fyrir 14,3 milljarða króna á genginu 7,95 til 9,20 krónur á hlut.

Í verðmati á VÍS sem Greining Íslandsbanka gaf nýverið út í tilefni af útboðinu voru bréf félagsins metin á 7,05 krónur á hlut. Hæsta sölugengi í útboðinu er því þrjátíu prósentum yfir verðmatsgenginu og meðalgengið fimmtungi yfir verðmati Greiningar Íslandsbanka.

Sigrún Ragna segir mikinn áhuga almennra fjárfesta á VÍS ánægjulegan og fagnar því að fá með þessu inn í félagið tæplega 5.000 nýja hluthafa. Með því hafi líka verið rutt úr vegi fyrirvörum sem Kauphöllin hafi sett um fjölda hluthafa í félaginu.

„Þetta er mjög góð dreifing og heppilegt, ekki síst fyrir tryggingafélög sem eru með mjög dreifðan hóp viðskiptavina, að eignarhaldið sé dreift. Það fer mjög vel saman,“ segir hún.

Þá segir Sigrún Ragna ljóst að VÍS sé eitt form af félögum sem mjög heppilegt sé að hafa með öðrum skráðum félögum. „Þar eru mismunandi tegundir af félögum og við höfum kynnt þetta félag sem sterkan kost í að vera arðgreiðslufélag.“